Кьурагьай пашман хабар агакьна: саки вири уьмуьр райондин образование вилик тухуниз, районэгьлийрин яшайиш хъсанаруниз бахш авур ватанперес, инсанперес, гьуьрметлу инсан Назаралиев Али Агьмедович рагьметдиз фена.
А. Назаралиев 1929-йисан июлдиз къуллугъчидин хизанда дидедиз хьана. Колхозар арадал гъайивални, Ватандин ЧIехи дяведин къурбандарни, азиятарни, дерт-гъамни, каш-мекьни, дяведилай гуьгъуьнин йисарин зегьметарни адаз акуна.
1947-йисуз юкьван школа куьтягьай жегьил Дагъустандин пединститутдик экечIна. 1951-йисуз ада диплом къачуна. Тарихдин муаллим Докъузпара райондин Къурушрин хуьруьн школадиз директорвилин къуллугъдал рекье туна. Са тIимил вахтни алатнач, ам Табасаран райОНО-дин заведующийвиле тайинарна.
Хайи хуьруьз хтайла адал Кьурагьрин юкьван школадин завучвилин, директорвилин, райкомдин пропагандадинни агит отделдин инструкторвилин, райОНО-дин заведующийвилин къуллугъар ихтибарна.
Кьурагь ва Кьасумхуьруьн районар акадарайла, Назаралиев Кьасумхуьруьн производственный управленидин парткомдин идеологиядин отделдин заведующийвиле тайинарна.
1981-йисуз райондин чIехибуру Али Агьмедовичаз Кьурагь райондин агьалияр яшайишдин рекьяй хуьдай управленидин кьиле акъвазун теклифна. Яшлубурухъ, пенсионеррихъ, набутрихъ галаз алакъалу и идарада ада саки къад йисуз кIвалахна ва инсанриз вичивай жедай галайвилер авуна.
“РСФСР-дин халкьдин просвещенидин отличник”, “РСФСР-дин соцобеспеченидин отличник” знакрин, “РФ-дин соцзащитадин лайихлу работник” тIварцIин ва хейлин маса шабагьрин иесиди жегьилри чешне къачудай баркаллу уьмуьр кечирмишна. ЧIехи хизандин сагьибди веледар обществодиз менфятлу инсанар яз тербияламишна. Али Агьмедовичан экуь къамат районэгьлийрин, ам чидайбурун рикIера гьамиша амукьда.
“Лезги газетдин” редакциядин коллективди рагьметлудан хизандиз, вири мукьва-кьилийриз башсагълугъвал гузва
