Ирандин гьуьлерин дяведин къуватрин ва Россиядин гьуьлерин дяведин флотдин Каспийский флотилиядин къуллугъчийрин арада мини-футболдайни цIил чIугунай дуствилин гуьруьш-акъажунар кьиле фена.
Ирандин ВМС-рин гимийрин отряддай тир “Дамаванд” эсминец ва ракетный “Пейкан” катер Дагъустандиз мугьман хьунин мярекатрин сергьятра аваз спортдин акъажунар Махачкъалада Елена Исинбаевадин тIварунихъ галай “Труд” стадиондал кьиле фена.
— Ихьтин мярекатри неинки агалкьунар ва шабагьар къазанмишдай, гьакI чи халкьар мадни мукьва ийидай, дуствилин алакъаяр мегькемардай мумкинвал гузва. Тарихдайни аквазвайвал, Дагъустанни Иран гзаф терефри садзава. Чна сада-садаз екез гьуьрметзава ва куьн чи республикадиз мугьман хьуни и араяр кьве патани хуьзвайди, мегькемарзавайди субутзава, гьа жигьетдай яз спортдин хилени, — мугьманар къаршиламишдайла къейдна Дагъустандин физический культурадин ва спортдин министрдин везифаяр вахтуналди тамамарзавайди тир Мегьамед Мегьамедова.
Ада мадни лагьайвал, Иран гьамиша спортдин макан яз гьисабзава, Ирандин спортсменар Азиядин, дуьньядин ва Олимпиададин къугъунра гьуьндуьр кукIушриз хкаж жезва. Азаддиз кьуршахар кьунай ва боксдай международный акъажунра иштиракун патал Ирандин спортсменар гьар йисуз Дагъустандиз мугьман жезва. ГьакIни Дагъустандин атлетар Иранда кьиле физвай турнирриз физва. Россиядин ВМФ-дин ва Ирандин ВМС-рин арада кьиле физвай и гуьруьшни чун вири патал спортдин ва дуствилин еке сувар я.
Спортсменар гьакIни Каспийский флотилиядин командующий Сергей Екимова, Ирандин ВМС-рин кьвед лагьай рангдин капитан Ник Кердара ва масабуру тебрикна.
Мини-футболдай ва цIил чIугунай Россиядин ВМФ-дин векилар гъалиб хьана.
Дагъви Шериф
