13-15-октябрдиз Махачкъалада волейболдай рушарин хкягъай командайрин арада акъажунар кьиле фена. Ина республикадин ДЮСШ-ра вердишвилер къачузвай, 2002-2003-йисара дидедиз хьанвай аялри иштиракна. Спортдин и мярекатдин тешкилатчи РД-дин образованидин ва илимдин министерство тир.
Акъажунра Дагъустандин шегьерринни районрин 16 командади, 160 спортсменди иштиракна. Гьа жигьетдай яз, Кьурагь райондин командадини — Жамиля Бабаевади, Маина Хизриевади, Марьям Гьамидовади, Амина Рамазановади, Зурейжат Бабахваевади, Каминат Бабаевади, Диана Султановади, Зубейдат Рамазановади.
Пуд юкъуз давам хьайи акъажунра 1-чкадиз Махачкъаладин, 2-чкадиз Каспийскдин, 3-чкадиз Унцукуль райондин, 4-чкадиз Кьурагь райондин волейболистар лайихлу хьана.
Кьурагь райондин рушарин волейболдин командадин тренер Эдгар Алибегова къейдайвал, ада вердишарзавай спортсменрихъ гьеле къугъунин ва акъажунрин тежриба хьанвач.
БОКС
18-21-октябрдиз Астраханда 12-13 йис хьанвай аялрин арада боксдай Вирироссиядин турнирда Сулейман-Стальский райондин векилар тафаватлу хьана. Турнирда чи уьлкведин гзаф регионрай командайри иштиракзавай. Дагъустандин патай 3 дестеди иштиракна. Сулейман-Стальский райондин спортдин, туризмдин ва жегьилрин крарин рекьяй комитетди и турнирдиз тренер Альберт Межидован къаюмвилик кваз 4 спортсмен рекье тунвай.
Акъажунра 12 командади, 147 аялди иштиракна. Альберт Межидова гьазурай кьве спортсменди — Артём Агъамегьамедова ва Азим Меликова 30 ва 36 кг-дин заланбурун арада гъалибвал къазанмишна. Алава яз, Азимаз хъсан техникадай махсус призни гана.
Дагъви Шериф
