Сулейман-Стальский райондин кьил Нариман Абдулмуталибова Кьасумхуьрелай тир зегьметдин ветеран, Зегьметдин Яру Пайдахдин ордендин сагьиб Велимет Керимовав “Сулейман-Стальский райондин вилик лайихлувилерай” гьуьрметдин знак шад гьалара вахкана (шикилда).
Секин къилихрин, сабурлу, камаллу инсан тир Велимет халу гьар сеферда Кьасумхуьруьн майдандал ва я рекье-куьчеда гьалтайла, зи рикIел Майрудин Бабаханован шиирдин цIapap къведа:
Регъуь жемир кIусни рехи кьилихъай,
Ам акьулдин лишан я.
Эгер вунни рехи ятIа, Шалбуз хьиз,
Вунни гьам кьван кьакьан я.
Вичин уьмуьрдин пеше хьайи шофервиликай, чилив къадирлувилелди эгечIуникай, уьмуьрдин игьтияж тир зегьметдикай, хийирлу крарикай В.Керимов ашкъидивди рахада. Вич заз мукьувай хъсандиз таниш тир 20-25 йисан къене и кас заз садрани наразивилин, масадак хкIадай, шел-хвалдин гафар рахана ван хьайиди туш.
В.Керимоваз зегьметдин дад, чилин къадир фад, гьеле жаван яз чир хьана.
— Нисиналди школада жедай, нисинилай данайрив, калерив фидай, диде-бубадиз колхоздин чуьлдин кIвалахра куьмекар гудай, — лугьузва къе, вичин уьмуьрдин жаван йисар рикIел хкиз, зегьметдин ветеранди.
Гьа йисара хуьрера механизаторвилин кеспи лап герекди тир. Трактордин, автомашиндин, комбайндин рулдихъ ацукьна, зегьмет чIугвазвай, хуьруьн майишат вилик тухузвай, рехъ-хвал туькIуьрзавай ксариз хуьрера еке гьуьрметни авай.
— Райондин военкоматдай рекье тур за 1955-йисуз шофервилин курсар куьтягьна, — давамарзава ихтилат В. Керимова. — Адалай гуьгъуьниз за и пешедиз саки 40 йис бахшна.
Витебск шегьерда армиядин жергейра къуллугъдайла, В. Керимова 3 йисуз частунин командирдин машиндин шофервал авуна. Армиядай хтай жегьилди и кеспи райондин заготскотда давамарна.
1964-йисуз Кьасумхуьруьн “Рычал-су”заводдин директор М.Ш. Шабанова техникадал ва зегьметдал рикI алай Велиметаз и карханадиз кIвалахал атун теклифна. Имни дуьшуьшдин кар тушир: гьа йисара ана акъудзавай продукциядин чIехи пай Советрин Союздин яргъал шегьерриз рекье твазвай. Гьавиляй парар дашмишун патал хъсан пешекарар — шоферар герекзавай.
В. Керимова и заводдихъ галаз 27 йисуз вичин кьисмет алакъалу авуна. И йисара ада “ЗИС”, “ЗИЛ”, “Прага” машинрал кIвалахна. Заводдиз цIийиз хкай “КамАЗ” машинни Велиметал ихтибарна. “Рычал-су” заводдин продукция дашмишиз, ада Москва, Тула, Казань, Тольятти, Краснодар, Баку, Ростов ва маса шегьеррин рекьер-мензилар са шумудра атIана, гьанрай заводдиз ва райондин маса карханайриз герек шейэр хкана.
Гьакъисагъвилелди кIвалахунихъ галаз санал В. Керимова заводдин ва райондин общественный уьмуьрдани активвилелди иштиракна. ИкI, 16 йисуз адакай заводдин партийный тешкилатрин секретарь, кьве сеферда райсоветдин ва са шумудра Кьасумхуьруьн советдин депутат, райондин партконференцийрин делегат хьана.
Производстводин кIвенкIвечи В.Керимоваз 1972-йисуз райисполкомдин ва 1981-йисуз РСФСР-дин недай-хъвадай шейэрин министерстводин патай “Жигули” маркадин машинар гана.
Саки 40 йисуз производствода шофервиле кIвалах авур, 30 йисуз вичин шикил райондин Гьуьрметдин доскада хьайи Велимет Керимован гьакъисагъ зегьмет гьакIни Зегьметдин Баркалладин 3-дережадин орден, Октябрдин революциядин 90 йисан, “Зегьметдин ветеран” медалар, 20-дав агакьна грамотаяр, “Коммунистический зегьметдин зарбачи”, “Соцсоревнованида гъалиб хьайиди” знакар, гзаф кьадар къиметлу пишкешар гуналди къейдна.
В. Керимов уьмуьрдин баркаллу рехъ фенва. И рехъ ада давамарни ийизва. Велимет халу хьтин инсанри чпин гьакъисагъ зегьметдалди, инсанвилин ерийралди, ацукьунин-къарагъунин дуьзгуьн къанажагъдалди амайбуруз чешне къалурзава, уьмуьр бегьерлуди ийизва.
— Къе яшар са кьадар хьайила, за жуван фейи уьмуьрдиз хьиз, хайиди тир хуьруьн, райондин алатай вахтаризни вил вегьезва, — лугьузва В.Керимова. — Гьам Кьасумхуьруьхъ, гьамни санлай райондихъ чIехи ва баркаллу тарих ава. И кардал за шадвал, дамахни ийизва.
Хазран Кьасумов
