25-октябрдиз Махачкъала шегьерда, Расул Гьамзатован тIварунихъ галай Милли библиотекада А.А.Тахо-Годидин тIварунихъ галай Дагъустандин педагогикадин илимдинни ахтармишунрин институтдин милли литературайрин сектор арадал атайдалай инихъ 40 йис тамам хьуниз талукьарнавай Вирироссиядин илимдинни тежрибадин “Филологическая наука и школа: диалог и сотрудничество” темадай конференция кьиле тухвана. (Адакай и нумрада хабар ганва)
И конференцияда иштиракун патал Хасавюрт райондин РУО-дин патай векилар яз Костек хуьруьн юкьван школадин къумукь чIаланни литературадин тежрибалу муаллим С.Г.Атавова ва Къурушрин хуьруьн 1-нумрадин юкьван школадин лезги чIаланни литературадин муаллим, и цIарарин автор рекье тунвай.Зи докладни эхиримжи йисара саки рикIелай алатнавай аялрин куьгьне къугъунрикай тир.
Муаллимри, гьа жергедай яз зани конференциядивай чи тIал алай месэлайриз къимет гун, куьмекдай рекьер къалурун вилив хуьзвай.
Авайвал лугьун, докладчийри неинки и институтдин ва адан милли литературайрин сектордин тарихдикай, агалкьунрикай суьгьбетна, гьакI хейлин татугайвилерни, гьялиз тежезвай, чебни институтдилай аслу тушиз, месэлаярни раижна. Чун гъавурда акьурвал, институтди кIвалахзава, амма илимдин ахтармишунар, методикадин теклифар, гьайиф хьи, чарарал аламукьзава. Ктабар акъудзамач чина. Вири крар Москвада абур кьабулунилай, ана пулдин такьатар жагъунилай аслу жезва…
Бес милли чIалар, литератураяр чирунин, хуьнин, виликди тухунин крар гьикI кьилиз акъудда? Школадиз, муаллимдиз ва аялриз ни куьмекда?
Конференциядал чпин докладар гваз экъечIна рахай алимри алай вахтунда милли школайра милли чIаларизни литературайриз ганвай сятерин кьадаррикай, авачир ктабрикай, абур авай гьаларикай, чи республикадин Халкьдин Собранидин депутатри, бязи чиновникри школайриз, муаллимриз са акьван фикир тагузвайдакайни, истемишзавай кьван вижесуз чарарикайни, лап агъуз тир мажибрикайни ва маса кимивилерикайни лагьана, гележегда хьайитIани гьалар хъсанвилихъ дегиш хьунихъ умудлувал къалурна.
Гьажи Къазиев,
“Къурушрин сес” газетдин кьилин редактордин заместитель
