Алатай гьафтеда РД-дин зегьметдин ва яшайишдин жигьетдай вилик тухудай министерстводин жегьилар кIвалахдалди таъминардай республикадин “Агалкьун” центрада (РМЦЗ) сентябрдиз Дагъустанда набут ва сергьятламиш хьанвай мумкинвилер авай инсанри пешекарвилин бажарагъ къалурун патал тешкилнавай республикадин “Абилимпикс” III чемпионатда куьмекар гайи волонтёррив шабагьар вахкуниз талукьарнавай мярекат кьиле фена.
РикIел хкин: цIи чемпионатда Махачкъала, Каспийск, Хасавюрт, Буйнакск, Дербент шегьеррай ва республикадин са шумуд, гьа гьисабдай яз Кьиблепатан Дагъустандин районрайни 100-дав агакьна атанвай ксари иштиракна. Чемпионатдин программадик 16 пешедай акъажунар квай. И мярекатда волонтёрри адан иштиракчияр ва мугьманар акъажунар кьиле физвай майданрал тухуз, гьакIни и серенжем тешкилунин ва кьиле тухунин крарани еке куьмекар гана.
Жегьил рушаривни гадайрив “Агалкьун” РМЦЗ-дин директор Шамил Мегьамедован тIварунихъай чухсагъулдин чарар центрадин школайра кIелзавай аялрихъ ва студентрихъ галаз кIвалах тухудай отделдин начальник Мария Целовальника вахкана. Шабагьар вахкудайла, ада волонтёрриз мад сеферда сагърай лагьана, инлай кьулухъни къени кIвалахар санал кьилиз акъудуник умуд кутазвайди къейдна.
Мярекатдал рахай жегьилри волонтёрвили кIеве авай ксариз куьмек гунихъ — къени крарик кьил кутунихъ галаз сад хьиз, чпизни жуьреба-жуьре ксарихъ галаз таниш жедай, тежриба къачудай ва гьар са кардив жавабдарвилелди эгечIдай, са шумуд месэла (кар) са гъилди кьилиз акъуддай вердишвилер, мумкинвилер гузвайдакай лагьана.
Регина Семедова
