И йикъара Р.Гьамзатован тIварунихъ галай Милли библиотекада  Дагъустандин литератураяр мектебра чирунин, чIалар хуьнин ва виликди тухунин месэлайриз талукьарнавай Вирироссиядин илимдинни практикадин конференция кьиле фена.

Ихьтин серенжем тешкилайбур РД-дин илимдинни образованидин минис­терство, А.А.Тахо-Годидин тIвару­нихъ га­­лай­ педагогикадин илимдинни ахтармишунардай институт ва тIвар кьунвай библиотека тир. Аниз Кеферпатан Кав­каз­дин­ республикайрин илимдин къуллугъчийриз, милли литературайринни чIала­рин муаллимриз, методистриз, яратмишдай интеллигенциядин векилриз теклифнавай.

Мярекат, куьруь гаф рахуналди, ДНИИП-дин директордин заместитель, илимрин доктор, профессор М.И. ­Шур­­паевади ачухна. Ада къейд авурвал, институтда милли литератураяр мектебра чирунал, методикадинни практикадин месэлаяр гьялунал машгъул сектор кардик кутуна алай йисуз 40 йис тамам хьанва. Адан кьиле саки 35 йисуз­ илимрин доктор, профессор, чи маш­гьур литературовед ва писатель, же­ми­ятдинни сиясатдин деятель Къурбан Халикьович Акимов акъвазна, яни и сектор Акимован зегьметдинни алакьунрин нетижа я, гьавиляй  институтдин коллек­тивди адаз екез гьуьрметни ийизва. И кар къейд авун яз, Къурбан Халикьовичав ва адахъ галаз санал и секторда кIва­лахзавай  илимдин чIехи къуллугъчи П.М.Магдиевадив гьуьрметдин грамотаяр вахкана. Идалай кьулухъ мярекатдин иштиракчийри милли литератураяр Дагъустан Республикадин школай­ра чирунин карда алай аямда гьалтзавай четин месэлайриз ва институтди ийизвай алахъунриз талукьарнавай М.И.Шурпаевадин, милли литературайрин сектордин тарихдикай Къ.Х.Акимован, алай вахтунда сектордин алимри-методистри кьилиз акъудзавай крарикай и сектордин гилан заведующий, илимрин кандидат Н.Э.Сафаралиеван гегьенш докладрихъ яб акална.

Милли чIаларинни литературайрин алакъайрикай  доклад ДГУ-дин Дагъустандин чIаларин кафедрадин заведующий М.Р.Багомедова авуна, гьикI хьи, чIалар хуьзвай ва виликди тухузвай асул чешме милли литератураяр я.

Конференциядин иштиракчияр тебрикиз ва гьялзавай месэлайрай чпин фи­кирар лугьуз, хейлин ксар рахана. Абу­рун­ жергеда ДГУ-дин профессор, ли­те­ра­туровед Гь.Гь.Гашаров, Москвадай атанвай мугьман, ана азербайжандин культурадин ва чIалан илимдинни мето­дикадин центрадин регьбер, илимрин кан­дидат, доцент А.-М.Сафаров, ДГПУ-дин профессорар, илимрин докторар В.М. ва З.М.Загьировар, Махачкъаладин 38-нумрадин юкьван школадин дидед чIаланни литературадин муаллим А.М. Баламирзоева, Дагъустандин халкьдин шаир Ш.И.Шагьмарданов ва мсб. авай.

Конференциядин нетижайрай махсус къарар кьабулна ва къарагъарнавай месэлаяр гьялунин рекьериз талукь хейлин теклифар гана.

Мерд Али