29-октябрдиз республикадин Гьукуматдин Председатель Артем Здунован регьбервилик кваз Дагъустандин министррин кабинетдин нубатдин заседание хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Заседанидал гъанвай сад лагьай месэла веревирд авунив эгечIдалди вилик Артем Здунова гьавадин шартIар чIур хьун мумкин тирвилихъ галаз алакъалу малумат гана. “Дагъустандин гидрометеорологиядин центради хабар гузвайвал, 31-октябрдилай 1-ноябрдалди республикада гьаваяр чIур хьун гуьзлемишзава. За Дагъустандин вири коммунальный къуллугъривай, муниципальный тешкилатривай ва МЧС-дивай и малуматдив мукьуфдивди эгечIун ва лазим тир кIвалах тухун тIалабзава”, — тагькимарна Дагъустандин премьерди.
Ахпа РД-дин финансрин министр 2020, 2021 ва 2022-йисарин пландин девир патал Дагъустандин бюджетдиз талукь месэладай рахана.
“2020-йисуз экономикадин жигьетдай агъадихъ галай дережайрив агакьун гуьзлемишзава: регионда санлай гьасилзавай продукциядин кьадар 719,8 миллиард манатдив (алай йисав гекъигайла, 3,7 процентдин гзаф яз), халкьди ишлемишдай шейэрин къиметар, гъиле авай йисав гекъигайла, 3,1 процентдин, мажибар — 6,8 процентдин хкаж хьун. Мажибар хкажун — им важиблу месэлайрикай сад яз амукьзава. Бюджетдин проектда, санлай къачурла, зегьметдин гьакъидин фонд артухарун патал 4 миллиард манатдилай виниз такьатар чара ийидайди къалурнава. Чпиз РФ-дин Президентдин “майдин указар” талукь жезвай бюджетдин хилен работникрин кьилдин категорийрин мажибар хкажун патал чара авун къалурнавай такьатрин умуми кьадардал 2,5 миллиард манат алава хъхьун гуьзлемишзава. И такьатрин са кьадар пай зегьметдин гьакъидин кIанин кьадар 12 агъзурни 133 манатдив агакьарун патал серфда. Сифте яз кьунвай гьисабралди, 2020-йис патал республикадин бюджетдин доходар 125,3 миллиард манатдив агакьдайди, гъиле авай йисав гекъигайла, 4 миллиард манатдин артух жедайди, бюджетдин харжияр 129,9 миллиард манатдин дережада жедайди къалурнава. Налогрин ва налогар тушир хсуси доходрин пулар 30,6 миллиард манатдин дережадив агакьдайди къалурнава”, — малумарна Юнус Саадуева.
Вичин нубатдай яз Артем Здунова регионда санлай къачурла гьасилзавай продукциядин кьадар ва мажибрин фонд артух хьун гуьзлемишзавай дережаяр квел бинеламишнавайди ятIа, гьа кардиз итиж авуна. И месэладиз талукь яз РД-дин экономикадин ва мулкар вилик тухунин министрдин везифаяр вахтуналди тамамарзавай Гьажи Султанова лагьайвал, эхиримжи кьве йисуз республикада мажибар хкаж жезва ва и кар къведай йисузни давам жеда. Регионда санлай къачурла гьасилзавай продукциядин кьадар артух хьуникай рахайтIа, министрди баян гайивал, им промышленностдин производство хкаж хьунихъ галаз алакъалу я.
РД-дин Гьукуматдин Председателди республикадин финансрин министр Юнус Саадуевавай налогрин пулар ва налогар тушир доходар артухардай мумкинвилер авани, авачни, гьа кардиз итиж авуна. РД-дин финансрин министрди къейд авурвал, малумарнавай дережайрив агакьарун патал вири мумкинвилер авазва.
Мярекатда РД-дин Халкьдин Собранидин бюджетдин, финансрин ва налогрин рекьяй Комитетдин председатель Сейфулагь Исакьова, РД-дин Халкьдин Собранидин законодательстводин, законлувилин, государстводин къурулушдин ва чкадин самоуправленидин рекьяй Комитетдин председатель Алаудин Мирзебалаева, РД-дин Халкьдин Собранидин экономикадин, инвестицийрин ва карчивилин рекьяй Комитетдин председатель Муса Мащилиева ва жавабдар къуллугърал алай маса ксарини иштиракна.
«Лезги газет»
