Сулейман-Стальский райондин пресс-къуллугъди “Лезги газетдиз” хабар гайи­вал, 28-октябрдиз КIварчагъа спортдин цIийи комплекс ачухуниз талукьарнавай шад мярекат кьиле фена. Ана райондин регьбер Нариман Абдулмуталибова, хуьрерин кьилери, райондин общественностдин, идарайрин ва тешкилатрин, спортдин сообществодин векилри иштиракна. Мярекатдиз атанвай багьа мугьманрин арада Дагъустандин физический культурадин ва спортдин министр Мегьамед Мегьамедов, Россиядин боксдин федерациядин генеральный секретарь Умар Кремлев, Дагъустандин боксдин федерациядин президент Альберт Селимов, машгьур спортсменар ва къунши хуьрерин делегациярни…  авай. Спортдин цIийи комплекс чи машгьур боксёр — IBO ва WBA версийрай пешекаррин арада дуьньядин чемпион Гьабиб Аллагьвердиеван тIварунихъ гала. И гафар имаратдални кхьенва. Ада вичини и мярекатда иштиракна…

Идалай виликни чна хабар гайивал, патарив гвай (ял ядай, яни багъ яз туь­кIуьр­навай, футбол, баскетбол ва волейбол къугъвадай, гъвечIи аялар машгъулардай…) чкаярни кваз, санлай 2 га чил кьунвай спортдин зурба объект машгьур общественный деятель ва меценат Имам Яралиеван хизандин такьатрихъ кьилиз акъудна ва ада райондиз багъишна.

Объект эцигунин проектдинни сметадин къимет 70 миллион манатдилай  гзаф я. Сулейман-Стальский райсобраниди и комплекс алай йисан 14-октябрдиз тамамвилелди республикадин хсусиятдиз вахкана. Анин ракIарар къунши хуьрерин агьа­лийризни, ашкъи авай виридаз ачух я.

Йикъан сятдин 11-даз шад мярекат “Дагъустан” ансамблдин кьуьлердайбуру чпин устадвал къалуруналди башламишна. КIватI хьанвайбурухъ элкъвена, райондин кьил Н.Абдулмуталибов рахана. Ада КIварчагъ дередин агьалийриз спортдин зурба имарат эцигна кьилиз акъудун, фадлай гуьзлемишзавай савкьат  абурув агакьун тебрикна.

— Къе чун еке вакъиадин шагьидар хьанва: КIварчагъа алай аямдин вири ­истемишунриз жаваб гузвай, гуьрчег ва ла­зим вири тадаракралди таъмин тир спортдин комплекс ишлемишиз вахканва. И объектдихъ неинки са КIварчагъар — икьван вахтунда спортдин са зални авачир хуьр, КIварчагърин дере, гьакI райондин яшайиш патални еке метлеб ава. Спорт, сагълам уьмуьр кьиле тухун къенин юкъуз­ ­жегьилри артух фикир гузвай, кар алай ме­сэлайрикай сад я. КIварчагъ дередин жегьилрихъ ихьтин спорткомплексдин ­игьтияж фадлай авай. Мурад ингье кьилиз­ акъатна. ЦIийи спорткомплексда вири ава: спортдин жуьреба-жуьре майданар ва ял ядай гуьрчег чкаяр. И проектди агьалийриз спортдин са шумуд жуьредал машгъул жедай, чпин алакьунар къалурдай, сагълам уьмуьр кьиле тухуз чалишмиш жедай еке мумкинвилер гузва. Яратмишнавай къулай шартIари спортдин ку­кIуш­рихъ сифте камар вегьедай жегьилрин кьа­дар мадни артух хьуниз куьмекда. Чна умудзава хьи, спортдин цIийи комплексдай гележегда чпелди неинки чи районди­, гьакI вири уьлкведи дамахдай маш­гьур­ спортсменар ­акъатда. Хайи районди 90 йисан юбилей къейдзавай йисуз ­икьван важиблу, багьа савкьат пишкешай Имам Музамудинович Яралиев сагърай,  — лагьа­на Нариман ­Абдулмуталибова.

Тебрикдин гафарилай кьулухъ райондин кьили  спортдин имарат эцигай кьилин­ устIар, карчи Мегьамедгьабиб Исаагъаеваз чухсагъул малумарна,  адаз тIвар кхьенвай сят багъишна.

Шад мярекатдал республикадин кьиле авай ксарин тIвару­нихъай РД-дин физический культурадин ва спортдин министр М.Мегьамедова дередин агьалийриз лишанлу вакъиа тебрикна, меценат ва общественный деятель Имам Яралиеваз и объект эцигна ишлемишиз вахкунай сагърай лагьана.

— Им гьакIан спорткомплекс туш. Инив кас рикI гваз, хайи чилихъ авай чIехи кIа­нивал къалуруналди эгечIна­ва. И карди адан халис ватанпересвиликай, жумартлувиликай, хайи халкьдихъ авай кIа­нивиликай лугьузва. Къуй и хъсанвал, жумартвал, виш сеферра артух хъхьана, чи меценатдив  вичивни ахгакьрай! Спортдин гуьрчег имаратди жегьилриз алакьунар къалурдай, чпин устадвал хкаждай еке мумкинвилер гузва. Чи спортсменрин, кьилди къа­чуртIа, боксёррин вилик гъалибвилин кукIушрихъ гьерекатдай цIийи рекьер ачух жезва. Чна, чи нубатдай яз, ихьтин къени крар кьилиз акъу­дунин карда куьмекар гуда, — къейдна министрди.

Гуьгъуьнлай мярекатдал Умар Кремлев, Гьабиб Аллагьвердиев ва масабурни рахана. Тебрикдин гафарихъ галаз санал абуру спорткомплекс эцигай И.Яралиеваз сагърай лагьана.

Гь.Аллагьвердиева  Сулейман-Стальский районда бокс вилик тухун ва машгьурун патал вичелай алакьдай вири жуьредин куьмекар гун хиве кьуна. ЦIийи спорткомплексдин важиблувиликай рахадайла, У.Кремлева къейд авурвал, и объектди санлай гзаф инсанар спортдал ва физический культурадал машгъул хьуниз куьмекда. Кьилиз акъудун лазим тир кIвалахдал гьалтайла, ам Дагъустандин спортдин виридалайни хъсанбурун жергеда ава.

Мярекатдиз рекье тунвай Къурушрин хуьруьн векил Гьажи Гьажиева Гьабиб Аллагьвердиеваз карачаевский жинсинин балкIан багъишна.

ЦIийи спорткомплекс ачухунин лишан тир лент атIун еке гьуьр­метдивди Нариман Абдулмуталибовал, Умар Кремлевал, Мегьамед Мегьамедовал ва Гьабиб Аллагьвердиевал тапшурмишна.

Гуьгъуьнлай мярекатдин иштиракчияр спортдин комплексда яратмишнавай къулайвилерихъ галаз таниш хьана. Гьабиб Аллагьвердиева абуруз спортзалар къалурна, анра лагьайтIа, жегьилар чпин гьунарар къалурунив эгечIнавай. Спортдин комплексдин дарамат — спортдинни гимнастикадин майданар, тренажёррин зал, медкабинет, душевояр, тренерар патал блок,  санузелар… ва лазим маса чкаяр алай аямдин вири истемишунриз жаваб гудайвал тамамвилелди тадаракламишнава.

Шад мярекат концертдин еке программадалди, кIватI хьанвайбурун гуьгьуьлар мадни хкажуналди акьалтIна.

Рагнеда Рамалданова