18-октябрдиз Росгвардиядин  Управленидин Дагъустан Республикада авай Каспийск шегьердин ОМОН арадал атана 20 йис тамам хьуниз талукьарнавай шад мярекат кьиле фена. Лишанлу вакъиа тебрикун патал иниз Росгвардиядин Кеферпатан Кавказдин округдин командующийдин заместитель, генерал-лейтенант Сергей Власенко, Дагъустандин Гьукуматдин Председателдин заместитель, генерал-майор Рамазан Жафаров, республикадин къанун-къайда хуьдай органринни ведомствойрин, Каспийск шегьердин администрациядин векилар, общественный ва жегьилрин тешкилатрин регьберар, шегьерэгьлияр, гьа жергедай яз аялар — гележегдин аскерар…  атанвай.

Мярекатар митингдилай башламишна. Ам, сифте гаф рахуналди, Сергей Власенкоди ачухна. Ада отряд неинки Дагъустан, гьакI санлай уьлкве патални четинди тир 1999-йисуз арадал атайди, республикадал международный террористрин геллегьри гьужумайла, ОМОН-дин къуллугъчийри къалурай кьегьалвал тариф авуниз лайихлу хьайиди, къенин юкъузни абуру чпин пак буржи вини дережада аваз кьилиз акъудзавайди къейдна.

— КьетIендаказ ОМОН-дин ветеранризни сагърай лугьуз кIанзава. Куь кье­гьалвални жуьрэтлувал амайбуруз чешне я. Куь тежрибади, чирвилерини камаллувили акьалтзавай несилдиз руьгьдинни ахлакьдин жигьетдай ва ватанпересвилин тербия гунин карда куьмекзава. Къе Ватандин вилик чпин пак буржи кьилиз акъуддайла телеф хьайи кIвалахдин рекьяй чи дустарни рикIел хкана кIанда. Абурун къаматар чи рикIера эбеди яз амукьда, — къейдна ада.

И гафарилай гуьгъуьниз, са декьикьада кисна акъвазуналди, телеф хьайи къуллугъчияр рикIел хкана.

Микрофондихъ атай Рамазан Жафарова Дагъустандин Кьил Владимир Ва­сильеван, Халкьдин Собранидин Председатель Хизри Шихсаидован ва ви­чин тIварунихъай лишанлу югъ тебрикна, ОМОН-дин къуллугъчияр гьамиша­ виниз тир пешекарвилелди, дирибашвилелди тафаватлу хьайиди, къенин юкъуз­ни и рекье абуру чпин везифаяр пешекарвилин виниз тир дережада кьилиз акъудун давамарзавайди къейдна.

Отряддин везифайрикай, агалкьунрикай  Росгвардиядин Дагъустан Республикада авай Управленидин начальник, полициядин генерал-майор Мегьамед Баачилова доклад авуна.

— Каспийскдин ОМОН дяведин вахтунда арадал атай ва гьа шартIара лигим хьайи сад лагьай отряд я, женгинин сифтегьан тежриба 1999-йисан вакъиайра къачуна. Отряддин командир Загьид Загьидов Россиядин Федерациядин Игит лагьай тIварцIиз лайихлу хьана, — рикIел хкана ада.

М.Баачилова алатнавай 20 йисуз отряддин 48 къуллугъчи госнаградайриз­, ведомстводин 193 наградадиз, Росгвардия арадал атайдалай кьулухъни 4 къуллугъчи — госнаградайриз ва ведомстводин 38 наградадиз лайихлу хьайи­ди къейдна. Республикада ислягьвал хуьн патал телеф хьайи 31 къуллугъчи (абу­рукай 27 — кIвалахдин везифаяр тамамардайла) гьамиша рикIера амукьдайдакай лагьана.

Идахъ галаз сад хьиз, ОМОН-дин командирди отряддин женгинин ва къул­лугъдин везифайрихъ ва кьилиз акъуднавай кIвалахдихъ галазни танишар­на. ИкI, адан гафарай малум хьайивал, алатнавай йисара ОМОН-дин къуллугъ­чийри административный къайдаяр чIурай 40 437 дуьшуьш дуьздал акъудна, уголовный тахсиркарвилер авунвай 225 кас кьуна, отряддин­ къуллугъчийрин куьмек галаз НВФ-дин 453 член, 69 блиндаж (база) тергна, 704 яракь, женгинин хейлин суьрсет, 163 СВУ, 302 гранат вахчуна.

— Къенин юкъуз завай инанмишвилелди лугьуз жеда хьи, отряддивай ви­лик эцигнавай гьар гьи жуьредин хьайитIани везифаяр — общественный ха­тасузвал хуьнилай махсус серенжемра иштиракунал къведалди — кьилиз акъудиз жеда, — къейдна Мегьамед Баачилова.

ОМОН-дин командирди ветеранрин, отряддин командир, полициядин полковник Ш.Х.Магомаеван тIварцIихъни ихтибарнавай подразделенидиз савадлудаказ, пешекарвилелди регьбервал гунай хуш келимаяр лагьана. Чпин чанарилайни гъил къачуналди, кIвалахдин везифаяр намуслудаказ кьилиз акъудзавай къуллугъчийрихъ мягькем сагъламвал, хизанра хушбахтлувал ва вилик эцигнавай макьсад кьилиз акъуддай къуватар хьун алхишна.

Митингдал кIвалахдин рекьяй везифаяр кьилиз акъуддайла телеф хьайи къуллугъчидин диде Светлана Владимировна Абдулгьамидовани рахана.

Гуьгъуьнлай тафаватлу хьайи къуллугъчийрив ведомстводин ва гьукумат­дин дережайрин шабагьар, къиметлу пишкешар вахкана. Абурун арада чи ва­­тандашарни ава. Митинг ОМОН-дин базадин гьаятда хкажнавай памятникдал­ цуьк­вер эцигуналди, ОМОН-дин къуллугъчияр жергейра аваз финалди акьалтIна.

Гуьгъуьнлай суварин мярекатар башламиш хьана. ОМОН-дин лишанлу йикъаз талукьарна еке программа гьазурнавай. Яракь гваз, гьакI гъилералди кукIунин, четинвилериз дурум гудай къайдаяр, яракьдай ягъунар, тахсиркарар кьуниз талукьарнавай гьерекатар, гьакIни подразделенийрин арада акъажунар (цIил ва БТР ялун)  ва икI мад къалурна.

ОМОН-дин къуллугъчийри женгина ишлемишнавай яракьрин, герек за­тIа­рин, отряддин транспортдин выставкани ачухнавай.

Эхирдай Росгвардиядин Кеферпатан Кавказдин округдин военный оркестр­ди концерт гана. Майдандал ачухнавай кухняда аскеррин кьилин тIуьн дадмишдай мумкинвални авай.

«Лезги газет»