Сулейман-Стальский райондиз мугьман хьунин сергьятра аваз, РД-дин Гьукуматдин Председатель Артем Здунов Кьасумхуьруьн 2-нумрадин юкьван школада кьиле тухвай эцигунрин кIвалахрихъ галаз таниш хьана. Идакай “Лезги газетдиз” РД-дин Кьилин Администрациядин ва Гьукуматдин пресс-къуллугъди хабар гана.
Эцигунрин кIвалахар ина шаз башламишнай ва алай йисан эхирдалди (графикда къалурнавай вахтунилай фад) ишлемишиз вахкуда. Школада 150 ученикдиз кIелдай чкаяр жедайвал я. Ина аялар патал алай аямдин вири шартIар арадал гъанва. Кьилди къачуртIа, чIехи спортзал, гьаятда тренажерар ва чукурунардай рекьер авай спортдин майданар туькIуьрнава.
Къейд ийин, школа “РФ-дин агьалияр тIем акакьдай ва къулай яшайишдин кIвалералди ва коммунальный къуллугъралди таъминарун” программадин сергьятра аваз эцигзава. Алай вахтунда цIийи мектебда къенепатан саки вири кIвалахар тамамарна куьтягьнава, лазим тадаракар ва алатар чкадал гъанва.
Алукьзавай хъуьтIуьн вахтунда аялри исятда тарсар кьиле тухузвай куьгьне дараматда ваъ, цIийи школада кIелдайвал, республикадин премьер-министрди мектеб алай йисан эхирдалди ишлемишиз вахкун тапшурмишнава.
«Лезги газет»
