Къав дегишарна

Мергьяматлувилин   программадин сергьятра аваз ва “Михьи рикI” фондунин тешкиллувилин куьмекдалди, “РусГидро” ПАО-дин  Дагъустандин филиалди  Каспийскдин гьуьлуьн кадетрин корпусдин спортзалдин къав дегишарунин кIвалахарни  тамамарна.

“Хъуьтуьл материалдикай спортзалдин къав туькIуьрайдалай кьулухъ 25 йис алатнава, — суьгьбетзава чирвилер гудай идарадин директор Омар Ома­рова. — Бюджетдин такьатар тахьун себеб яз, гьар йисуз къавун гагь са чка, гагь маса чка  ремонт авуниз мажбур жезвай. Амма ида тIили атуникай хуьзвачир. Къати марфар къвазвай вахтунда спортзалдин  чиле полиэтилен экIягъуниз, яд  лигенралди, ведройралди кIватIуниз мажбур жезвай. Ида кадетар спортдин рекьяй гьазурунин гьерекатдиз  кьецI гузвай”.

Каспийскдин гьуьлуьн кадетрин корпус Дагъустанда авай ихьтин жуьредин чирвилер гудай тек са чка я. Школа-интернатда вири республикадай тир  350  аял тербияламишзава. Абурукай чIехи пай чпин диде-бубаяр къуллугърин везифаяр тамамардайла чан гайи ксарин аялар я. Умуми образование гунин программадилай гъейри, кадетри военный ва гьуьлерин  кьушунриз талукь гьазурвилерни аквазва.

Э.Казумовади къейдзавайвал, яшайишдин месэлайрин рекьяй жавабдарвал хивез къачуз алахъзавай компания яз, РусГидроди  гегьенш сергьятрин мергья­матлувилин программа уьмуьрдиз куьчуьрмишзава. Адан бинеда пешекар энергетикрин цIийи несил  тербияламишун, гьакIни компаниядин филиалар авай вири регионра яшайишдин жигьетдай къулай шартIар тешкилун, уьмуьрдин ери хъсанарун ава. РусГидродин мер­гьяматлувилин  программадин  кар алай хилерик акатзава: образование, экология, здравоохранение, спорт, культура, яшайишдин идарайриз ва тешкилатриз куьмек гун, мергьяматлувилин фондарин, НКО-рин ва дарда авай агьалийрин  гъил кьун, регионрин къурулушар гегьенш сергьятра аваз виликди тухун.

Багьа хьанва

Сентябрдин эхиррин делилралди, са вацра яшамиш хьун патал чарасуз лазим­ тир продуктрин шартIунин къимет (агъа кIанин) 3 агъзурни 969 манатдиз ба­рабар хьанва. РД-дин Госстатистикадин  орган­дин­­ делилралди,  йисан сифте кьилелай инихъ  адан кьадар 1 процентдин  багьа хьан­ва. ИкI, и делилдал гьалтайла­, Да­гъу­стан СКФО-дин регионрин арада кьвед лагьай чкадал акъатнава. Вири­да­лайни багьа суьрсет — Чечняда, виридалайни ужузди Кеферпатан Осетияда ава.

Са вацра яшамиш хьун патал чарасуз лазим тир продуктрин сиягьдик тахминан 15 кг фу ва чIахар, 12,5 кг картуфар, 1,5 кг емишар ва ширинлухар, тахминан  3 кг як, 1,2 кг  балугъ, 18 кг некIедин суьрсет акатзава.

33 процентдин таъмин я

Республикадин хуьруьн майишатдин хилен  зегьметчияр лазим техникадалди анжах 33 процентдин таъмин я. Идакай и йикъара кьиле фейи совещанидал РД-дин хуьруьн майишатдин ва недай суьрсетдин министрдин земеститель Адильхан Ганакаева малумарна.

Министерстводин пресс-къуллугъдай хабар гузвайвал, совещанидал зу­лун­ тумар цунин, майвайрин бегьер кIватI­­­на куьтягьунин ва са жерге маса ме­сэлаяр веревирдна. Министерстводин набататчивилин, чилерин ва эменнидин алакъайрин управленидин начальник Назим Рамазанован гафаралди, алай вахтунда республикада пландик кутун­вай­ майданрин са паюна зулун тумар цан­ва. Гьа са вахтунда, ада хабар гайивал, майишатра прунздин, картуфрин, майвайрин бегьер кIва­тIунин кIвалах давам жезва­.

Вилик тухун патал

Чпе республикадин саки пудай са пай агьа­лияр яшамиш жезвай  дагълух районра шей гьасилдай карханаяр эцигуниз  акъатзавай харжийрин са пай арадал хкун патал 2019-йисуз Дагъустандин властри 80 миллион манатдин такьатар чара ийида. И пул 35-дав агакьна проектар кьилиз акъудун патал серф ийиз жеда, малумарна ТАСС-диз ре­гиондин экономикадин ва мулкар вилик тухунин министрдин везифаяр вахтуналди тамамарзавай Гьажи Султанова. “Чна дагъ­лух­ чкайриз куьмек гунин проект кьилиз акъуд­­­зава. Алай йисуз куьмек яз республикадин бюджетдай 80 миллион манатдин такьатар чара ийидайвал я. Чна дагълух чкайра — гьуьлуьн дережадилай 500 метрдилай гзаф вине авай хуьрера карханаяр тешкилуниз акъатзавай харжияр арадал хкун патал такьатар конкурсдин бинедаллаз чара ийида. Проектдал асаслу яз гъвечIи, 20 сотыхдив агакьна майдан алай теплицаяр, салан майваяр ва емишар хуьдай чкаяр, хуьруьн майишатдин суьрсет гьялдай чкаяр, шей гьасилдай  производство тешкилда”, — лагьана Гь.Султанова.

“Эгер гъилевай йисуз чалай проект агалкьунралди кьилиз акъудиз алакьайтIа, чна и программадай чара ийизвай пулдин такьатрин кьадар артухарун теклифда. Дагълух чкайра чи республикадин саки пудай са пай агьалияр яшамиш жезва. Анрай агьалияр шегьерриз куьч тахьун патал дагълух районра кIвалахдин чкаяр тешкилун важиблу я”, — алава хъувуна  Гь.Султанова.

«Лезги газет»