Ахцегь райондин агъсакъалрин Советдин нубатдин заседанида Дагъустан Республикадин агъсакъалрин Советдин член, академик Эмирбег Эмирбегова, райондин собранидин председатель Абдул-Керим Палчаева, райадминистрациядин кьилин заместитель Мегьамед-Рауф Гъаниева, райондин общественный палатадин председатель Али Исмаилова, агъсакъалри ва чкадин СМИ-рин векилри иштиракна.
Сифте гаф рахуналди, мярекат райондин агъсакъалрин советдин председатель Къеземет Къеземетова ачухна ва трибунадихъ Эмирбег Зиядовичаз теклифна. Ада 17-октябрдиз республикада сад тир политюгъ кьиле тухузвайди ва чкадин важиблу месэлайрихъ галаз санал РД-дин Кьил Владимир Васильеван кьве йисан кIвалахдизни къимет гузвайди къейдна.
— Шак алач, Владимир Абдулалиевичан регьбервилик кваз республикада аквадай хьтин дегишвилер жезва. Кьилди къачуртIа, коррупциядихъ галаз баришугъ тежер женг чIугвазва, налогрин база мягькемарзава, гьар жуьре карханаяр арадал гъуналди, кIвалахдай чкаяр тешкилзава, яшайишдин метлебдин программайрай школаяр, аялрин бахчаяр, азарханаяр эцигзава, рекьер, къаналар туькIуьрзава, гъвечIи бизнес ва хуьруьн майишат артмишзава.
Месела, цIи “Мегьарамдхуьр-Ахцегь-Рутул” рекьин 7 километр мензил цIийикIа туькIуьр хъувунва. Федеральный “Михьи яд” программадай республикадин жемят хъвадай михьи целди таъминардайвал я. Заз чида хьи, къведай йисуз ина цин “Ухул-Ахцегь” линия туькIуьрзава. Рутулар галайвал газопровод тухун патал 3 миллиард манат чара ийизва ва икI мад, — лагьана Э.Эмирбегова.
Ахпа мярекат суал-жавабдин, суьгьбетдин тегьерда давам хьана.
— Эхь, муьфтехурринни угърийрин вилик пад кьаз, халкь патал кIвалахиз алахънава Владимир Васильев. И карда чна вирида адаз куьмекун, гьарда вичин къуллугъдин чкадал михьидаказ кIвалахун лазим я, — къейдна Къ.Къеземетова.
— Виликрай кьиле хьайибур яргъан чпел чIугваз алахъзавайтIа, В.Васильева вири сад хьиз кьуна кIвалахзава. Ингье Кьиблепатан Дагъустандизни гила еке финансар къвезва. ТахьайтIа, чавай кьве йисуз 7 школадин дараматар туькIуьр хъийиз жедайни? — лагьана А-К.Палчаева.
— Дуьз я, касди халкь патал кIвалахзава. Сагърай вич! Чкайрал инсанар активни ва къайгъудар хьана кIанда. Бязибуру лагьайтIа, рекьера ятар твазва, абур чIурзава, рекьерин къерехар хкьаз, анрал кIвалер, жугъунар эцигзава… Къени районда са заготовительный кооператив — заготбаза авач. Ахцегьар хуьр яни, посёлок яни, тахьайтIа, — шегьер? Зи кьил акъатзавач, — къейдна зегьметдин ветеран Къардаш Мамалиева.
— Маса гудай чка авачирвиляй бязибуру ичер атIунни хъийизвач. Хийир авачирвиляй инсанар чпин багъларихъ гелкъвезмач. Луткуна аялрин бахчаяр авач. Гьукуматдин куьмек галачиз чкадин властривай и месэлаяр гьялиз жедач,- лагьана А. Исмаилова.
Райондин дишегьлийрин советдин председатель Таира Мегьарамовади ва рахай маса юлдашри районда аялри ял ядай махсус лагерь эцигунин, КБО-дин кIвалах хъсанарунин, хуьрериз фидай рекьер туькIуьр хъувунин месэлаяр къарагъарна.
Эхирдай Эмирбег Зиядовича халкьдин тIал алай месэлаяр республикадин Кьилив агакьардайди ва абур гьялун патал алахъдайди хиве кьуна.
Гуьгъуьнлай Эмирбег Зиядовича жуьреба-жуьре месэлаяр гваз атанвай районэгьлияр кьабулна, ам чкайрал бязи хуьрерин агьалийрихъ галаз гуьруьшмиш хьана.
Дашдемир Шерифалиев
