19-октябрдиз Дагъустандин премьер-министр Артем Здунов Мегьарамдхуьруьн районда хьана. Ина шадвилин гьалара автомобилрин ЛукIар-Ярукьвалар рехъ ахъайна.
Рекьин и участокда кIвалахар 2015-йисуз гъиле кьурди тир. Пешекарри къейдзавайвал, цIийи рехъ туькIуьруни автомобилар ахъайдай ЦIийи Филер-Тагьирхуьр международный пунктарихъ агакьдалди авай мензил 21 километрдин куьруь ийидай, гьа са вахтунда рекье жезвай вахтни 40 декьикьадин тIимилардай мумкинвал арадал гъанва.
ЦIийи рехъ ишлемишиз вахкуникди Самур вацIалай кьибледихъ галай хуьрери Дагъустандин кеферпатан паюнихъ, Дербент ва Махачкъала шегьеррихъ галаз улакьралди алакъа хуьн таъминардай цIийи маршрутни кардик акатзава.
Рехъ ишлемишиз вахкунихъ галаз алакъалу мярекатдал рахай Артем Здунова и маршрутдихъ хуьруьн майишат вилик тухунин, культурадин алакъаяр мягькемарунин, тIебиатдин надир имаратдихъ — Россияда авай сармашухрин субтропикрин тамухъ тухузвай рехъ куьруь авуналди, туризм вилик тухунин барадайни яшайишдин, экономикадин жигьетдай еке метлеб авайди къейдна. “Им неинки район патал, гьакI санлай республика патални важиблу метлеб авай вакъиа я. Им чна цIи ишлемишиз вахкузвай тек са имарат туш. Республикада алай йисуз рекьерин майишат вилик тухун патал 11 миллиард манатдин такьатар серфдайвал я. Рекьер туькIуьрунин кIвалахар вири регион тирвал кьиле тухузва. ЦIийи рехъ алай аямдин истемишунрихъ галаз кьадайвал, ерилудаказ туькIуьрнава, им лап важиблу кар я. Заз куьне, играми Мегьарамдхуьруьн райондин агьалияр, а рехъ Дагъустандин хушбахтвал патал ишлемишун, куь муниципалитетдиз къвезвай туристрин кьадар артух хьун кIанзава. Квехъ ислягьвал ва хушбахтвал, рехъ ачухуниз талукьарнавай мярекатда иштиракзавай аялрихъ сагъламвал ва кIелунра агалкьунар хьун кIанзава”, — лагьана рехъ ахъаюниз талукь мярекатда иштиракзавай райондин агьалийрихъ элкъвена рахай премьер-министрди.
Ада лазим тир кIвалахар вахтунда кьилиз акъудай рекьер тухудай пешекарризни сагърай лагьана.
ЦIийи рехъ туькIуьрунин чарасузвал мадни квехъ галаз алакъалу я лагьайтIа, республикадин кьибледихъ галай рекьерикай улакьри менфят къачун авай гьалди рекьера гьерекат кьиле тухунин хатасузвилин барадай ийизвай истемишунриз жаваб гузвачир. Идалайни гъейри, цIийи рехъ туькIуьруни вирида ишлемишдай рекьерин участокрал, гьа гьисабдай федеральный “Кавказ” шегьре рекьел ва сергьятдал алай улакьар ахъайдай пунктарихъ тухузвай маршрутда гьалтзавай чкадин метлеб авай рекьерал ацалтзавай пар хейлин тIимилардай мумкинвал гана. ЛукIар-Ярукьвалар шегьре рекьяй суткада юкьван гьисабдалди 1400-далай виниз улакьар физва, гележегда абурун кьадар 2 агъзурдав кьван агакьда.
Мегьарамдхуьруьн райондин кьил Фарид Агьмедова къейд авурвал, 30 агъзур касдилай виниз агьалияр яшамиш жезвай 17 хуьруьн жемятдин вил и рехъ туькIуьрунал фадлай алайди тир. Улакьрихъ галаз алакъалу и проект кьилиз акъуддай чIавуз Гуьлгери вацIал эцигнавай 81 метрдин муькъвел ва Самур-Дербент къаналдал алай муькъвелни тайин тир кIвалахар кьиле тухвана. “Сергьятдал алай чи райондин мулкарай яна тухудай парарин кьадар артух жезвайди фикирда кьурла, и рекьи улакьар ишлемишунин кIвалах хейлин къулай хьуниз куьмекдайдал шак алач”, — инанмишвал къалурна муниципалитетдин кьили.
«Лезги газет»
