И йикъара Республикадин клинический (центральный) больницадин (РКБ) 85 йис тамам хьана. Юбилейдиз талукьарна, “Республикадин клинический больница: виликдай ва гила” илимдинни тежрибадин конференция кьиле фена. Ам тешкилайбур Дагъустан Республикадин здравоохраненидин министерство, “Республикадин клинический больница” ГБУ ва Даггосмедуниверситет тир.
Махачкъалада, Къумукьрин театрда, конференция ачухуниз талукьарнавай паюна РД-дин Гьукуматдин Председателдин Сад лагьай заместитель Анатолий Къарибова, Дагъустандин Халкьдин Собранидин Председателдин заместитель Елена Ельниковади, здравоохраненидин рекьяй комитетдин председатель Висампаша Ханалиева, РД-дин здравоохраненидин министр Жамалудин Гьажиибрагьимова, республикадин здравоохраненидин къуллугъчийрин профсоюздин председатель Зумруд Бучаевади, региондин са жерге ведомствойрин кьилери, медицинадин хилен машгьур алимри ва гзаф кьадар духтурри иштиракна…
Юбилей тебрик авун патал Дагъларин уьлкведиз Россиядин медицинадин машгьур центрайрай багьа мугьманарни атанвай. Абурун арада авай: РАН-дин академик, Н.Н.Бурденкодин тIварунихъ галай факультетский клиникадин директор Александр Черноусов, Н.И.Пирогован тIварунихъ галай РНИМУ-дин аялрин яшарин хирургиядин университетский клиникадин директор Владимир Розинов, Сеченован университетдин 2-нумрадин хирургиядин кафедрадин заведующий Татьяна Хоробрых ва масабур.
Анатолий Къарибова Дагъустандин Кьил В.Васильеван тIварунихъай Россиядин медицинадин къадим идарайрикай сад тир РКБ-дин коллективдиз юбилей тебрикна. Им неинки и идарада зегьмет чIугвазвай къуллугъчийрин, гьакIни вири региондин здравоохраненидин хилени лишанлу вакъиа тирди лагьана. Больница арадал атунин чешмейрив жемиятдин ва государстводин машгьур деятелар — агьалийрин сагъламвилин къайгъударвал чIугун чпин рикIерин эмир тир ва и кардиз уьмуьр бахшнавай ксар акъвазайди рикIел хкана. Къенин юкъуз и идарада еке дегишвилер кьиле физвайди, РКБ-да сифтегьанбурун жергеда аваз виниз тир технологияр ишлемишуналди, медицинадин ерилу куьмек агакьарзавайди, идалди агьалийривай региондай къецез фин тавуна, чкадал чеб сагъариз жезвайди къейдна.
Дагъустандин Халкьдин Собранидин Председателдин тIварунихъай коллективдин тIварцIихъ тебрикдин келимаяр Е.Ельниковади кIелна.
Дагъустандин здравоохраненидин министр Ж.Гьажиибрагьимова агьалийрин сагъламвилин къуллугъда акъвазнавай идарадин коллективдиз лишанлу вакъиа тебрик авунихъ галаз сад хьиз, Республикадин клиникадин больницадиз чи ватандаш машгьур хирург Александр Вишневскийдин тIвар гун теклифнавайди раижна.
— И идарадиз кьилин (центральный) больница гьавайда лугьузвач, и кар рикIелай алудмир ва дамах ая. Квехъ мадни еке агалкьунар хьурай! Куь пешеда гьакьван важиблу тир хсуси сагъламвилин къайгъударвал авунни рикIелай ракъурмир, — лагьана министрди.
РКБ-дин кьилин духтур Газиявдибир Мусаева медицинадин идаради гьар йикъан тежрибада цIийи технологийрикай менфят къачузвайди, материально-технический база гьамиша цIийи хъийизвайди, амма мадни гзаф крар хъувун вилик кумайди къейдна. Адан гафарай мадни малум хьайивал, алай вахтунда и больницада 2 агъзурдалай гзаф къуллугъчийри зегьмет чIугвазва. Гьар йисуз и клиникада 40 агъзурдалай виниз азарлуйри чпин сагъламвал мягькемарзава. Къенин юкъуз РКБ-дик — 70 махсус, перинатальный ва куникди хьайи хирерин, гематологиядин центраяр, гьакIни реанимациядин 8 отделение ква. Юбилейдин вилик квай йикъара ина ратарин азарар сагъардай цIийи мад са центради вичин ракIарар ачухна. РКБ-да, Дагъустанда сифтегьанбурун жергедай яз,регион патал цIийибур тир технологияр кардик кутуна, абурукай менфят къачузва. Г.Мусаева анжах вини дережадин пешекарвал авай кадрийривай 80-далай гзаф йисара республикадин здравоохраненидин хиле вилик жергейра жез алакьайди къейдна.
Тебрикдин гафар лагьайдалай кьулухъ мярекатдин илимдин пай башламишна. Россияда аялрин хирургиядин месэлайриз ва гележегдин планриз талукьарнавай сад лагьай лекция медицинадин илимрин доктор, профессор Владимир Розинова кIелна.
Гуьгъуьнлай секцийра кIвалах давамарна.
* * *
Юбилейдин сергьятра аваз здравоохраненидин хиле зегьмет чIугвазвай са жерге къуллугъчийрив госнаградаяр вахкана. Дагъустан Республикадин лайихлу духтур лагьай тIвар гайибурун арада ава: РКБ-дин кьилин духтурдин поликлиникадин кIвалахдин рекьяй заместитель Майсарат Зубайруева, торакальный хирургиядин отделенидин заведующий Агьмед Халилов, акушер-гинеколог Марьям Гьасанова. Дагъустан Республикадин Халкьдин духтур лагьай тIварцIиз духтур-эндоскопист Башир Исханов лайихлу хьана. РД-дин здравоохраненидин лайихлу работник лагьай тIвар чIехи медсестраяр тир Салимат Мамаевадиз ва Зилфира Агъабалаевадиз, гьакIни медсестра Тамила Велегаевадиз гана. РД-дин Гьукуматдин Гьуьрметдин грамота кьилин духтурдин эпидемиологиядин рекьяй заместитель Написат Исаловадив вахкана. Хурудал алкIурдай РД-дин здравоохраненидин отличник знакдиз кьилин духтурдин заместитель Хайбула Рохоев, духтур-невролог Заира Гьасанова, Перинатальный центрадин акушер-гинеколог Шагьабудин Исабегов, травматологиядин ва ортопедиядин отделенидин медсестра Патимат Алибегова ва нефрологиядин отделенидин чIехи медсестра Фиренгиз Тагьирова лайихлу хьана. Мубаракрай!
Рагнеда Рамалданова
