Чи ватанэгьлияр — гьар сана
Урусатдин хейлин шегьерра хьиз, Краснодардани фадлай яшамиш жезвай лезгияр тIимил авач. Хайи чиливай яргъа хьанватIани, абуру чеб авай чкайра милли адетар, халкьдин чIал ва меденият хуьзва. Ихьтин ксарикай сад Нажмудин Велединович Муртузов я.
Ам 1973-йисан 9-январдиз Ахцегь райондин Фиярин хуьре дидедиз хьана. 1990-йисуз ана юкьван мектеб куьтягьна, 1991-1993-йисара РФ-дин яракьлу кьуватрин жергейра къуллугъна.
1993-1994-йисара ада “Евразия турс” ООО-дин директордин заместителвал авуна. Хъсан чирвилер, кьатIунар ва рикIе чIехи мурадарни къастар авай жегьилди гзаф крарик кьил кутуна. 1994-йисуз ам Кубандин гьукуматдин университетдин юридический факультетдик экечIна ва вад йисалай анаг агалкьунралди куьтягьна. Студент яз, 1995-йисуз Нажмудина Краснодарда сифте яз “Вуч? Гьина? Мус?” къанажагъдиз талукь къугъунин клуб тешкилна ва адакай анин сад лагьай президент хьана. Университетда кIелдай йисара юридический факультетдин спортдинни медениятдин вири мярекатар адан гуьзчивиликни жавабдарвилик квай.
Краснодардин КВН-да Нажмудинан регьбервилик хьайи “Къанундин сергьятар — Краснодардин юристар” дестедикай галаз-галаз кьве йисуз (1998-1999) шегьердин гъалибчи хьана.
Кьисметди Махачкъаладиз ахкъудай жегьил пешекарди 1999-2002-йисара “Атом” ЗАО-да, гуьгъуьнлай кьве йисуз “Юждаг” МУП-да — юрист, 2009-йисалди “Теплоэнергетик Россоюзстрой” ООО-да чIехи юрист-меслятчи яз кIвалахна.
2003-йисуз Краснодарда “Дагъустандин цIилинин машгьур пагьливанар” тIвар алаз Нажмудин Велединовича тешкилай ансамблди федеральный каналрин телепроектра Дагъустан Республикадин ва Краснодардин крайдин патай иштиракзава, чпин алакьунар РФ-дизни, СНГ-дизни раижзава. Исятда цIилинин пагьливанрин дестедал “Росэкстрим” тIвар ала.
ДатIана тешкилатчивилин крар бажармишзавай ватанэгьлиди 2005-йисуз “Самур-Кубань” тIвар алай футболдин команда арадал гъана.
Халкьдин ватанпересди 2014-йисалай Краснодардин крайдин лезгийрин жемиятдин тешкилатдин (ККОО) председателдин заместитель яз зегьмет чIугвазва. Медениятдин мярекатар тешкилунин, кьиле тухунин жигьетдай адахъ лап хъсан алакьунар ава. Нажмудинан хизанда рушни гада чIехи жезва.
Краснодарда авай чи ватанэгьли, блогер ва карчи Заур Балакшиева Нажмудин Муртузован гьакъиндай икI лугьузва: “Адахъ галаз зун 15 йис идалай вилик, Краснодарда авай лезгийри Яран суварин мярекат кьиле тухудайла, таниш хьана. Ам милли мярекатар тешкилуник кьил кутазвай, вичи тамадавални ийизвай инсан я. Адан гафарихъ яб акалайла, гуьгъуьнлай ада кьиле тухузвай крарикайни чир хьайила, заз ам рикI михьи, милливилихъ ялзавай ватанперес тирди чир хьана. Ам халкьдин месэлайрикай, тарихдикай, медениятдикай хабар авай кас я”.
Къуй чи ватанэгьлияр, гьина аватIани, сагъ ва шад, чпихъни еке агалкьунар хьурай!
К.Ферзалиев
