Мукьвара яратмишдайбуруз виликди физ куьмекдай “Сотворение” тIвар алай Центради Дагъустандин халкьдин шаир Расул Гьамзатован хайи йикъаз талукьарна “ЧIехи бубайрин чIал” проектдин сергьятра аваз “Расул Гьамзатован лацу дурнаяр” лишандик кваз Вирироссиядин конкурс кьиле тухвана.
Конкурсдихъ са шумуд номинация авай: “Эссе”, “Шикилар”, “Сочинение”, “Хайи чIалал шиирар кIелун”, “Презентация”, “Искусство”. Ана школьникри ва чIехи яшара авай инсанри иштиракна.
Шад жедай кар ам я хьи, “Хайи чIалал шиирар кIелун” номинацияда Махачкъала шегьердин 40-нумрадин юкьван мектебда 9-классда кIелзавай Гуьлназ Гьажиевади 13-15 йисарин яшара авай школьникрин арада 1-чка кьуна ва ам Вирироссиядин конкурсдин гъалибчидин дипломдиз лайихлу хьана. Идакай чаз гьа и мектебда лезги чIалан тарсар гузвай муаллим Мариян Бугаевади хабар гана. Къейд ийин, Гуьлназ Гьажиевади лезги чIалал М.Бугаевади кхьенвай “Расул Гьамзатоваз” шиир кIелна.
Чна Мариян Бугаевадиз ва адан ученица Гуьлназ Гьажиевадиз агалкьун рикIин сидкьидай мубаракзава!
Чи мухбир
