“Эгер чна инсанриз виридалайни гзаф духтур мукьва я лугьузватIа, Чилин сирериз виридалайни гзаф геолог мукьва я. “РФ-дин лайихлу геолог” тIвар къазанмишай республикадин тек са алим, илим патал чан эцигай кас Димир Абдулаевич Мирзоева РАН-дин ДНЦ-дин геологиядин Институтдиз 15 йисалай артух девирда регьбервалнай. Республикада геологиядин жигьетдай ада фикир тагай месэла жагъурун, заз чиз, четин я”. Ихьтин келимайрилай башламиш жезва и мукьвара чапдиз акъатнавай, алимдин уьмуьрдин рекьикай кхьенвай “Руьгьдин геология” ктаб. Адан авторри — РАН-дин ДНЦ-дин геологиядин Институтдин директор, геолого-минералогический илимрин доктор В.И.Черкашина ва РД-дин культурадин лайихлу работник, политикадин илимрин кандидат, РФ-дин СЖ-дин член Э.Д.Эмирова гьисабзавайвал, ктаб Дагъустандин геология кIвачел акьалтунин муракаб кардин бине кутур касдикай — геологиядин рекьяй алим Димир Мирзоевакай, адан уьмуьрдин ва илимдин рекьяй яратмишунрин вири терефрикай кхьенва. Алатнавай вахт аннамишуни, гьисабзава абуру, чаз алай вахт дуьз кьабулиз куьмекда.
…Са затIни ада виликамаз тестикьардачир, нетижаяр кьаз тади къачудачир. Гьамиша шаклувалдай, бязи вахтара вичи вич инкардай, гьахъ жагъуриз алахъдай. Адан рикIе гьамиша ахтармишунардайдан гьевес авай. КIвалахдиз талукь месэлайрив ам гьамиша кIевелай эгечIдай: “Жуван буржи тамамара, нетижайрал мукъаят хьухь, са гафуналди — гьереката!”. Гъиле кьур кар ада гьамиша кьилиз акъуддай, къастунал кIевивалдай. Гьар йикъан кIвалахар — гъвечIибурни, чIехибурни — гуьгъуьнлай вири сад жедай ва Димир Абдулаевич патал уьмуьрдин метлебдиз элкъведай, кхьенва ктабда.
Юлдашри рикIел хкизвайвал, Институтдин директор яз, Димир Мирзоев дердиникай хабар кьан тийир регьимсуз администратордиз элкъвенач, ада вичин къуллугъчийрин вилик акъвазнавай четин месэлаяр рикIивай кьабулдай. Адан уьмуьрда гьам илимдихъ галаз алакъалу ва гьамни инсандин уьмуьрдиз талукь агалкьунарни, гьам рикI хайи вахтарни хьайиди я.
Аламатдин кар ам я хьи, адан рикIе стIун пехилвал, заланвал авачир. Вичин амадагрин агалкьунрал — тежрибайрин, экспедицийрин нетижайрал, диссертацияр хуьнал — рикIин сидкьидай шадвалдай. Эхиримжи йисара ам залан азарди гьелекзавай, амма адан чинал гьамиша мили хъвер жедай.
И ктаб архивдин материал ва геологиядай учебник хьиз ваъ, илимдиз къуллугъ авур касдин уьмуьрдикай юлдашрин рикIел хкунар авай чан алай дневник хьиз туькIуьрнава, кхьизва авторри. “Къуй ам кIелзавай гьар са касди аламатдин инсан — зурба алим Димир Абдулаевич Мирзоеван уьмуьрдин ва яратмишунрин рекьикай вичиз хъсан нетижаяр хкудун патал менфят къачурай”, — къейднава авторри эхирдай.
Чи мухбир
