Дербентдин центральный больницада (ада Кьиблепатан Дагъустандин вири районрин агьалийризни къуллугъзава) жезвай хъсан дегишвилери гьам коллектив, гьам азарлуяр шадарзава. Ина эхиримжи кьве йисуз цIийи отделенияр ачухна, алай аямдин техника, аппаратар кардик кутуна. Кар алакьдай тежрибалу духтурар кIвалахал кьабулна. Азарлуяр герек дарманралди таъминарзава.
— Духтурар, медсестраяр, санитаркаяр азарлуйрив эгечIзавай гьални дегиш хьанва, — лугьузва эндокринологиядин отделенидин старший медсестра Агьмедова Светланади.
Ахцегьа дидедиз хьана. Махачкъалада медучилище куьтягьна. 1983-йисуз хайи хуьре кIвалахдив эгечIна. 1986-йисалай С.Агьмедовади Дербентдин центральный больницада зегьмет чIугвазва. Сифтедай — хирургиядин отделенида авай, 2009-йисуз эндокринологиядин отделение ачухайла, ана старший медсестра я. Кьилин категориядин пешекарди вичин везифаяр намуслувилелди кьилиз акъудзава. Отделенидин заведующий Мевлуьдинов Арсена лугьузвайвал, Светлана Сабировна жавабдарвал гьиссзавай, начагъбурун къуллугъда акъвазнавай хъсан пешекар я. Коллективди, начагъбуру адалай разивалзава.
«Лезги газет»
