Дагъустандин зегьметдин ва яшайишдин жигьетдай вилик финин рекьяй министерстводин сайтда хабар ганвайвал, и йикъара РД-дин Гьукуматдин Председателдин Сад лагьай заместитель Анатолий Къарибован регьбервилик кваз республикадин яшайишдинни зегьметдин алакъаяр къайдада туниз талукьарнавай нубатдин Пуд патан (Трёхсторонний) комиссиядин заседание кьиле фена.
Анал Дагъустанда кIвалахдин чкайрин квотайриз талукь яз республикадин закондин проект веревирдна. Заседанида Дагъустандин зегьметдин ва яшайишдин жигьетдай вилик финин министрдин заместитель Мурад Къазиева, республикадин министерствойринни ведомствойрин, гьакIни Дагъустандин профсоюзрин организацийрин союздин, “Дагъустандин промышленникрин ва предпринимателрин” кIвалахдалди таъминардайбурун (работодатели) кIватIалдин векилри ва масабурур иштиракна. И проектди инвалидар ва кIвалах жагъуруна четинвилер ацалтзавай агьалияр кIвалахал кьабулунин праводин, экономикадин ва квотаяр чара авунин дибар тайинарда.
Веревирдзавай месэла гьялунин важиблувал къейд авун яз, вице-премьерди лагьана: “КIвалахдин чкаяр чара авуниз (квотирование) талукь закон кьабулун инвалидриз амайбурухъ галаз сад хьтин зегьметдин ихтиярар уьмуьрдиз кечирмишдай мумкинвилер таъминарун патал герек я. Чна къенин юкъуз арадал атанвай гьалар веревирдна. Тежрибади къалурзавайвал, им инвалидрин, пенсиядиз экъечIдалди тIимил вахт амай ксарин ва жегьилрин месэлаяр гьялун патал менфятлу рекьерикай сад я. Закондин проектди и категориядик акатзавай ксар кIвалахал кьабулунин квотаяр тайинарун, организацияр гьукуматдинбур ва кьилдин ксаринбур хьунилай аслу тушиз, къалурнава”.
Мадни лагьайвал, пенсиядиз экъечIдалди тIимил вахт амай ксариз пешедихъ галаз алакъалу чирвилер гунизни артух фикир гуда. Чпин пешекарвал хкажун ва цIийи пеше чир хьун патал пенсиядиз экъечIдалди тIимил вахт амай 800-дав агакьна ксари йисан эхирдалди “Демография” милли проектдин сергьятра аваз чирвилер къачуда.
Сергьятламиш хьанвай мумкинвилер авайбурун месэладал хтун яз, Анатолий Къарибова регионда мукьвара ахьтин ксари чпин бажарагъ къалурунин, абур кIвалахдалди таъминарунин макьсаддалди тешкилзавай республикадин “Абилимпикс” чемпионат 3-сеферда кьиле фейиди рикIел хкана. Идалайни гъейри, Россияда ва садлай сефер яз Дагъустанда — психикадин нукьсанар авай инсанрин “Махсус Абилимпикс” чемпионатни.
Дагъустан Республикада яшайишдин хилен идарайра сергьятламиш хьанвай мумкинвилер авай ксар патал къулайвилер арадал гъуниз, алатай йисарив гекъигайла, цIи гзаф такьатар чара авунвайдини алава хъувуна.
Анатолий Къарибов регионда мажибдин кьадардикайни рахана. ИкI, адан гафаралди, алай йисуз кьабулнавай серенжемрин нетижада ам къвердавай артухарун таъминарда.Виликамаз авай делилрал асаслу яз, цIинин 1-зур йисан вахтунда дагъустанвийрин дуллух, алатай йисан талукь девирдив гекъигайла, 6,1 процентдин артух хьанва. МРОТ-дин кьадарни хкажнава.
Заседанидал веревирд авур кьвед лагьай месэла Виридуьньядин гьерекатрин “За достойный труд” йикъан сергьятра аваз Вирироссиядин профсоюзрин акция кьиле тухуниз талукьди тир. Идакай Дагъустандин профсоюзрин организацийрин союздин председатель Абдулла Мегьамедова галай-галайвал лагьана.
Заседанидин нетижайрал асаслу яз республикадин Пуд патан комиссиядин теклифар гьазурда. Гуьгъуьнлай абур уьмуьрдиз кечирмишун, кьилиз акъудун патал властдин жавабдар органрал ва организацийрал рекье твада.
Рагнеда Рамалданова
