Курхуьруьн М.Рагьимован тIварунихъ галай 1-нумрадин юкьван мектебдин директор Гьасанбегов Мегьамедкерим Къагьриманович гьам хуьре, гьамни районда гьуьрметзавай ксарикай сад я. Ам и хуьре ВОВ-дин ветеран Къагьримананни Гуьлселеман хизанда 1956-йисан 16-февралдиз дидедиз хьана. Чидач, адаз амле Къачабегалай (ам математик тир) ирс атанайтIани, гьеле мектебдиз фидалди ада тупIаралди ва хуралайни гьисабунардай. 1972-йисуз Мегьамедкерим, 8-класс куьтягьна, Дербентдин педучилищедик экечIна. Вадралди училище акьалтIарай ам Дагъустандин государстводин пединститутдин математикадинни физикадин факультетдиз гьахьна. Мегьамедкерима инани лап хъсандиз кIелна.
Институт ада яру дипломдалди куьтягьна, математикадинни физикадин муаллимвилин пеше къачуна. Пуд йисуз ада Къаякент райондин Уселикент хуьруьн юкьван мектебда директордин заместитель ва математикадин муаллимни яз кIвалахна. Гуьгъуьнлай Дербентдин 4-нумрадин ГПТУ-да муаллим ва общежитида тербиячи хьана. ИкI, ам къуллугъдин кIарарай винелди хкаж жез башламишна. 1986-йисалай 1991-йисалди Мегьамедкерима Сулейман-Стальский райондин образованидин управленида методист, инспектор яз кIвалахна.
Ихтибар авур вири кIвалахра вич кеспидал рикI алай, кар чидай, гъавурдик кваз кIвалахзавайди яз къалурунай вирида гьуьрмет, ихтибар ийиз хьана. Гуьгъуьнлай адакай образованидин управленида пешекар хьана. Кар алакьдай кас тирди фикирда кьуна, райондин администрацияди Мегьамедкерим Гьасанбеговаз хуьруьн 1-нумрадин юкьван мектебдин директорвал авун ихтибарна. ИкI, 2014-йисалай ам и мектебдин директор я.
Анин материально-технический база йисалай-суз хъсан жезва. Мектеб итернетдик кутунва, кабинетар, классар девирдин истемишунриз жаваб гудайвал тадаракламишнава. И мумкинвилери муаллимрин чирвилерни са кьадарда цицIи авунва, абурук ашкъи кутунва, аялрин чирвилерни йикъалай-къуз артухарзава. Исятда “Алай аямдин школа” проект тамамарун ва “Точка роста” центр арадал гъун патал зегьмет чIугвазва. И карда райадминистрацияди тереф хвенва, куьмек яз мукьвара тадаракарни хкидайвал я. “Образование” проектдин бинедаллаз мектебдиз цIийи “Газель” машин ганва.
Мектебди райондин, республикадин, федеральный конкурсра, олимпиадайра, килигунра активвилелди иштиракзава, сифтегьан ва приздин чкаярни кьазва. Мектеб инновационный программаяр кьилиз акъудунин конкурсдин гъалибчи хьана. 2017-йисуз мектеб Вирироссиядин конкурсдин лауреат — гъалибчи хьана, гьа са вахтунда, Вирироссиядин образованидин “Школа будущего” форумда иштиракуналди, Россиядин лап хъсан 100 мектебдин сиягьдик акатнава. Директор Мегьамедкерим Гьасанбеговаз “Директор года — 2017” ва Междуна-родный еридин академиядин членвилин шагьадатнама ганва. Мектебди ва аялри гзаф конкурсра, олимпиадайрани иштиракна, нетижаярни хъсанбур хьана. ЦIи мектеб акьалтIарай 16 аялдикай 2 къизилдин медалриз лайихлу хьана, 6 касди институтра, 5-да техникумрани училищейра кIелзава.
Мегьамедкерим Гьасанбегов гзаф кьадар грамотайрин сагьиб, РД-дин образованидин отличник, РФ-дин умуми образованидин гьуьрметлу работник, зегьметдин ветеран я. Общественный тапшуругъарни кьилиз акъудзава. 2019-2020-кIелунин йисазни мектеб къавариз ракь ягъуналди, рак-дакIар, 467 кв метрда полар дегишаруналди, 600 кв. метрда тротуардин плитаяр ва кафель туналди гьазур хьана. Ихьтин куьмекар Зугьраб Шайдаева ва райадминистрацияди гана. Мегьамедкерим Гьасанбегова абуруз чухсагъул лугьузва.
Райсудин Набиев,
муаллим, зегьметдин ветеран
