Акьул бахтлувилин сад лагьай лишан я.
(Халкьдин мисал)
Гьар са хуьруьхъ, миллетдихъ вичин баркаллу рухваяр ва рушар ава. Заз инал вичикай ихтилат ийиз кIанзавайди чи лезги чилин дамах, тербиядин дестек, чи муаллимрин даях тир Мегьарамдхуьруьн райондин образованидин управленида яргъал йисара методиствиле кIвалахзавай Гьажиева Амина Селимовна я.
Ам 1949-йисан 17-августдиз Мегьарамдхуьре муаллимдин хизанда дидедиз хьана. Юкьван мектеб агалкьунралди акьалтIарай Амина Дагъустандин пединститутдин физикадинни математикадин факультетдиз гьахьна ва ам хъсан чирвилер къачуналди куьтягьна.
ГъвечIи чIавалай аялрал Аминадин гзаф рикI алай. Вичин зегьметдин рехъ ада 1972-йисалай Ярагъ-Къазмайрин юкьван мектебда физикадин тарсар гунилай башламишна. Са йисалай ам Мегьарамдхуьруьн юкьван мектебдиз физикадин муаллимвиле кIвалахал хъфена.
1987-йисалай инихъ Амина Селимовнади Мегьарамдхуьруьн райондин образованидин управленида методист яз кIвалахзава. Яргъал йисарин бегьерлу зегьметдин нетижа яз, ам “Россиядин Федерациядин умуми образованидин лайихлу работник” лагьай тIварцIиз лайихлу хьанва. Адан гъилелай шумудни са конкурс, шумудни са семинар фена. Виринра ада вич гьахъвал гвай, дуьзвал кIани инсан яз къалурна. Ам чIалан девлетлувилелди, пешедиз вафалувилелди неинки чирвилер, гьакI рикIни кваз аялриз гуз гьазур хьуналди тафаватлу жезва.
Хъсан тербиячи, муаллим хьиз, Амина Селимовна хъсан кайвани, еке хизандин иесини я. Ада вичин вири аялриз кьилин образование къачудай мумкинвал гана. Абурукай духтурар, муаллимар ва маса пешейрин иесияр хьанва.
Мукьвара Амина Селимовнади вичин 70 йисан юбилей къейдна. Къуй квехъ чандин сагъвал, яргъал уьмуьр, бахтлу гележег хьурай! Квез алукьзавай муаллимрин сувар мубаракрай! Къуй куь рикIе авай вири мурадар кьилиз акъатрай, гьуьрметлу Амина Селимовна!
Магьият Жаруллаева, муаллим
