И йикъара, Муаллимрин йикъан сергьятра аваз, Мегьарамдхуьруьн райондин кьил Фарид Агьмедова образованидин хиле кIвалахзавай са жерге ксарив шабагьар вахкунин шад серенжем кьиле тухвана. «Лезги газетдив» и хабар райадминистрациядин пресс-къуллугъди агакьарна.

Райадминистрациядин чIехи залда кьиле фейи мярекатда райондин мектебра ва образованидин идарайра кIвалахзавай муаллимри, директорри ва масабуру иштиракна. Пешекарвилин сувар тебрикуналди, акьалтзавай несилдиз чирвилерни тербия гунин карда муаллимдин кьетIен зегьмет къейдуналди, мярекат райондин кьил Ф. Агьмедова ачухна.

Ада къейд авурвал, районда образованидин гьалар йис-сандавай хъсанвилихъ физва. «Гьелбетда, им куьне, муаллимри, чирвилер гунин кIвалах хъсандиз тешкилунин, сабурлувилелди ва пешекарвилелди умуми зегьмет чIугунин нетижа я. Зун чIалахъ я хьи, образованидин хиле идалай кьулухъни чавай гъалибвилер къазанмишиз жеда», — муаллимрихъ элкъвена, лагьана райондин регьберди.

Гуьгъуьнлай ада «Мегьарамдхуьруьн район» МР-дин кьилин, РД-дин образованидин ва илимдин министерстводин, РД-дин халкьдин образованидин ва илимдин профсоюздин республикадин комитетдин патай образованидин хиле кIвалахзавай 40-далайни гзаф муаллимрив, тербиячийрив гьуьрметдин грамотаяр вахкана. Ф.Агьмедова бязи муаллимрив «РД-дин образованидин отличник» шабагьни вахкана.

Чпин нубатда муаллимри чирвилеринни тагьсилдин месэлайриз, муаллимрин зегьметдиз фикир гунай райондин кьилиз алхишдин келимаяр лагьана.

«Лезги газет»