Кьурагь райадминистрациядин пресс — къуллугъди хабар гайивал, алатай гьафтеда Кьурагьрин стадиондал Вирироссиядин физкультурадинни спортдин комплекс (ВФСК) ГТО-дин нормативар вахкун патал агьалийрин арада райондин 3-чемпионат кьиле фена. И серенжемдин тешкилатчи райадминистрациядин физический культурадин, спортдин ва жегьилрин крарин рекьяй отдел тир. Чемпионатда 18 йисалай 70 йисалди яшара авай 150-дав агакьна районэгьлийри иштиракна.
Серенжем кьиле тухуниз талукьарнавай шад мярекат райондин администрациядин физкультурадин, спортдин ва жегьилрин крарин рекьяй отделдин начальник Рамиз Рамазанова ачухна
— Саламалейкум, гьуьрметлу дустар ва мугьманар! Къе чна ГТО-дин нормативар вахкун патал райондин чемпионат кьиле тухузва. И серенжемда багьа мугьманрини иштиракзава: Дагъустандин Халкьдин Собранидин депутат Сейфулагь Исакьова ва “Трезвая Россия” общественный гьерекатдин ДРО-дин регьбер Шамил Алиева. Малум тирвал, тIвар кьунвай гьерекатди акьалтзавай несилдиз руьгьдинни ахлакьдин тербия гуник лайихлу пай кутазва, ам чи уьлкведа сагълам уьмуьр пропаганда авунал ва Федеральный “Трезвая Россия” проект уьмуьрдиз кечирмишунални машгъул жезва, — лагьана ада.
Гуьгъуьнлай мярекатдал Кьурагь райондин администрациядин кьилин заместитель Махач Хариев ва винидихъ тIварар кьунвай мугьманарни рахана.
Чемпионатдик спортдин 8 жуьредай (60 ва 200 метрдин мензилриз чукурунай, акъвазай чкадилай яргъаз хкадарунай, чене акъудунай, снаряд (700 граммдин заланвал авай граната) гадарунай, акъвазна ва я ацукьна пневматикадин винтовкадай лишанар ягъунай ва икI мад) акъажунар квай.
Эхирдай судьяйрин 7 касдикай ибарат коллегияди нетижаяр кьурдалай кьулухъ чемпионатдин гъалибчийрив шад гьалара медалар, грамотаяр ва рикIел аламукьдай пишкешар вахкана. Идалайни гъейри, и акъажунра гъалибвал къазанмишай ксари райондин хкянавай командадик кваз алай йисан 11 ва 12-октябрдиз кьиле фидай республикадин чемпионатда чпин алакьунар къалурда.
«Лезги газет»
