Ахцегь райондин 90 йисан юбилейдин серенжемрин сергьятра аваз А.Гъаниеван тIварунихъ галай ДЮСШ-дин залда РСФСР-дин ФК-дин лайихлу работник, азаддиз кьуршахар кьунайни самбодай СССР-дин спортдин мастер Сулейман Эфендиеван гьуьрметдай Ахцегь райондин регьбер Осман Абдулкеримован призар патал азаддиз кьуршахар кьунай 2005-2006-йисара дидедиз хьайи жегьилрин арада республикадин дережадин турнир кьиле фена. Кьилин судья РФ-дин спортдин мастер, бажарагълу тренер Фейруз Садыхов тир.
2015-йисалай тухун адетдиз элкъвенвай и турнирда Махачкъала, Каспийск, Избербаш, Дербент, Дагъустандин Огни шегьеррин, Ахцегь, Дербент, Дахадаев, Докъузпара, Мегьарамдхуьруьн, Къайтагъ, Рутул, Сулейман — Стальский, Шамильский районрин командайрик кваз 200-дав агакьна жегьил пагьливанри чпин устадвал къалурна. Акъажунрин залда спортдин ветеран, камаллу агъсакъал Сулейман Эфендиев вич, РД-дин физический культурадин ва спортдин министрдин заместитель Зайнал Салаутдинов, Ахцегь райондин кьил Осман Абдулкеримов, райсобранидин председатель Абдул-Керим Палчаев, Ахцегьрин хуьруьн кьил Низами Эфендиев ва маса юлдашарни авай.
— Ахцегьар зурба пагьливанрин макан я. Гьахьтинбурун тамам несил арадал гъанвай Сулейман Эфендиева къе яшлу кьилихъни, галатун тийижиз, ингье жегьилар тербияламишзава. Эхиримжи йисара районда спорт, иллаки азаддиз кьуршахар кьунин жуьре вилик тухуниз чна кьетIен фикир гузва: спортдин са шумуд майдан туькIуьрнава, Гъаниеван тIварунихъ галай спортшкола, школайрин спортзалар ремонтнава, къведай йисалай райцентрада чIехи спорткомплекс эцигун фикирдик ква, — турнирдин иштиракчияр тебрик авуналди, къейдна Осман Магьмудовича.
— За квез жуван ва республикадин кьиле авай ксарин патай Ахцегь райондин 90 йисан юбилей рикIин сидкьидай мубаракзава. Къуй квехъ гьар са карда еке агалкьунар хьурай! Республикадин дережада аваз кьиле тухузвай и турнирда 13 командади иштиракун, гьелбетда, им, эвелимжи нубатда, адак кьил кутунвай Сулейман Эфендиеван ва Ахцегь раймуниципалитетдин регьбер Осман Абдулкеримован лайихлувал я, — лагьана Зайнал Салаутдинова.
Райондин культурадин управленидин начальникдин заместитель Сулейман Сулейманова турнирдин тешкилатчийринни иштиракчийрин тIварцIихъ РД-дин Халкьдин Собранидин Председатель Хизри Шихсаидова рекье тунвай тебрикдин Чар кIелна. Рахунрилай кьулухъ турнирдин иштиракчийрин гуьгьуьл-гьевес манидарри хкажна.
Жегьил пагьливанрин арада кьиле фейи къизгъин бягьсерин нетижада чпин заланвиляй акъажунрин чемпионарни призёрар тайин хьана. Гъалибвилин 1,2 ва 3-чкаяр къазанмишай вири пагьливанар О.М. Абдулкеримован патай талукь тир дережайрин медалриз, кубокриз, гьуьрметдин грамотайриз ва пулдин пишкешриз лайихлу хьана. Тафаватлу хьайи бязи пагьливанриз “руьгьдин къуватдай”, “лап хъсан техникадай”, “тамашачийрин рикIиз хуш хьунай” алава махсус призарни гана.
Ингье турнирдин чемпионрин тIварар: Султанагьмедов Султан (26 кг, Избербаш); Агъаширинов Агъаширин (28 кг, Белиж); Рабаданов Ислам (30 кг, Къайтагъ); Пирмегьамедов Исхак (32 кг, Дербент); Рабаданов Абдурагьман (35 кг, Къайтагъ); Салагьбегов Карим (41 кг, Махачкъала); Аскеров Арслан (44 кг, Каспийск); Агъаширинов Умудбег (48 кг, Белиж); ТIалибов Назир (52 кг, Дербент); Ремиханов Адам (58 кг, Белиж).
“Жуван кIвалин” майдандал кьиле тухвай акъажунра Ахцегь райондин командадик квай спортсменрикай и сеферда 1-чка, гьайиф хьи, садавайни кьаз хьанач. Агьмедов Артур (30 кг), Абдулкеримов Керим (32 кг) ва Набиев Абдуллагь (35 кг) — 2 ва мад 8 жегьил 3-чкайриз лайихлу хьана.
Дашдемир Шерифалиев
