Алай йисан 17-28 сентябрдиз Дагъустандин образование вилик тухудай институтда (ДИРО) лезги чIалайни литературадай курсар кьиле тухвана. Муаллимриз лезги чIалай, литературадай, педагогикадай, психологиядай ва маса хилерай маналу лекцияр кIелна. И курсара лезги чIаланни литературадин кIуьд муаллимди иштиракна: Каспийск шегьердин гимназиядай Аллагьвердиева Оксанади, 9-нумрадин юкьван школадай Мегьамедова Мафизата, Махачкъала шегьердин 11-гимназиядай Амаханова Индиради, Огнидин 5-нумрадин юкьван школадай Гьажиева Басиради, Махачкъаладин 40-нумрадин юкьван школадай Бугаева Марияна, Дербентдин “Дуьньядин культура” гимназиядай — Магьмудова Таисади, Сулейман-Стальский райондин Шихидхуьруьн юкьван школадай гьикаятчи Шихнебиев Нажмудина, Хив райондин ЗахитIрин юкьван школадай Къарабегов Руслана ва и цIарарин автор, Хасавюрт райондин Къурушрин хуьруьн 1-нумрадин юкьван школадай Къазиев Гьажибалади.
Курсар са куьруь вахтунда кьиле фенатIани, ДИРО-дин лезги чIаланни литературадин секциядин руководитель Теймурова Нагима Мегьамедовнади чун цIийи методикайрихъ, технологийрихъ галаз танишарна ва чирвилер хкаждай вири шартIар яратмишна.
Курсариз атанвай муаллимриз Махачкъала шегьердин 40-нумрадин юкьван школадин лезги чIаланни литературадин муаллим Бугаева Марияна “Хуьруьг Тагьир ва адан яратмишунар” темадай тухвай ачух тарс бегенмиш ва ам рикIел аламукьдайди хьана. Гьа и тарсунай чир жезва хьи, муаллим вичин пешедиз лайихлу тирди.
Курсара чирвилер хкажай муаллимрин патай чаз лекцияр кIелай муаллимриз, иллаки Нагима Мегьамедовнадиз сагърай лугьуз кIанзава, чпихъ мадни еке агалкьунар хьурай.
Гьажибала Къазиев, муаллим
