5-октябрь — Муаллимрин международный югъ вири муаллимриз, сифте нубатда, вичи яргъал йисара дидед чIалан муаллимвиле кIвалахзавай Махачкъаладин 8-нумрадин лицейдин директор Земфира Забуровна Алиевадиз, завуч Вера Васильевна Жамалудиновадиз, хайиди тир Ахцегьрин 2-нумрадин юкьван школадин коллективдиз газетдин чинилай мубарак ийиз, редакциядиз лицейдин муаллим Наиля Алимегьамедовна Урдуханова атанвай. (Ахцегьрин тIвар кьунвай школа эцигайди Наилядин буба Алимегьамед Алияров я).
Наиля вич патал и югъ генани лишанлу я: адан 65 йис тамам жезва. Чна юбилярдиз ва вири муаллимриз и югъ — сувар рикIин сидкьидай мубаракзава:
Мубаракрай квез сувар,
Азиз муаллимар!
Ачух хьурай куь цавар
Михьиз, муаллимар!
Шадаррай куьн несилрин
Гьунарри нурлу!
Тебрикрай куьн эсилри
Генани гурлуз.
Къадим хьурай жегьилвал
Куь руьгьда даим!
Акьулдиз гуз агьилвал,
Генг ийиз илим…
