Куь ихтиярар
Играми кIелзавайбур! Гъилевай нумрадилай гатIунна, чна газетда цIийи са шумуд рубрика кардик кутазва: “Дармандин хъчар”, “Мергьяматлувал”, “Зенд”, “Чакай кхьенай”, “Гафарин алемдай”, “Куь ихтиярар”, “Чи бубайрин яшайишдай”. “Дармандин хъчар” рубрикадик кваз инсандин сагъламвал патал хийир авай, жуьреба-жуьре азарар сагъар хъувунин карда менфят къачузвай хъчарикай, набататрикай, “Мергьяматлувал” рубрикада хайи район, шегьер, хуьр, халкь патал мергьяматлувилин кIвалахар ийизвай ксарикай, “Гафарин алемдай” рубрикадик кваз чеб лезги чIалан словарра аватIани, кхьинра, рахунра тIимил гьалтзавай гафарикай, “Куь ихтиярар” рубрикада къанунрикай, инсандин ихтияррикай, “Чи бубайрин яшайишдай” рубрикада вилик девирра чIехи бубайри чпин уьмуьрда хийир къачур хуьруьн майишатдин алатрикай, къаб-къажахдикай ва маса затIарикай ихтилатда. “Зенд” рубрикадик кваз тайин са вакъиадикай, гьерекатдикай куьруьдаказ лагьанвай фикирар, “Чакай кхьенай” рубрикада чи халкьдикай, баркаллу ватанэгьлийрикай маса миллетрин векилри лагьанвай келимаяр, гафар-чIалар чапда.
И нумрада лагьайтIа, “Куь ихтиярар” рубрикадик кваз чна, фамилия дегишардайла, ИНН дегишарун герек жезвани, авачни, гьадакай лугьуда.
ИНН уьлкведин гьар са агьалидиз гьамишалугъ яз са сеферда гузва. Фамилия дегишарайла, ИНН-дин нумра дегишарун герек къвезвач. Амма цIийи фамилия къалурнавай ИНН-дин цIийи шагьадатнама вахчуна кIанда.
Къанунар фикирда кьуртIа, цIийи ИНН вахчунин акьалтIай чарасузвал авач.
Къейд ийин хьи, фамилия дегишарайдалай кьулухъ ИНН-дин цIийи шагьадатнама пулсуз гузва.
Чи йикъара лагьайтIа, ИНН-дин цIийи шагьадатнама МФЦ-дин куьмекдалди вахчуз жеда. И месэла МФЦ-дин куьмекдалди гьялдайла, паспорт ва эвленмиш хьунин гьакъиндай шагьадатнама герек я.
Гьазурайди — Агьмед Магьмудов
