И йикъара Ахцегь районда азаддиз кьуршахар кьунай IV сеферда яз, райондин кьил О.Абдулкеримован савкьатар къачун патал  республикадин турнир кьиле фена. И хабар «Лезги газетдив» райондин администрациядин пресс-къуллугъди агакьарна.

А.Гъаниеван тIварунихъ галай ДЮСШ-да кьиле фейи акъажунар азаддиз кьуршахар кьунай ва самбодай СССР-дин спортдин устад, РСФСР-дин ФК-дин лайихлу къуллугъчи Эфендиев Сулейман Абдулгьамидовичаз талукьарна.

Спортдин мярекатда гьуьрметлу мугьманар яз Сулейман Эфендиева, РД-дин спортдин министрдин заместитель Зайнал Салаудинова, райондин кьил Осман Абдулкеримова, райсобранидин депутатрин председатель Абдул-Керим Палчаева, Ахцегь хуьруьн администрациядин кьил Низами Эфендиева иштиракна.

Акъажунар ачухунин ва тебрикдин сифте гаф райондин кьил О.Абдулкеримов рахана. Ада районда спорт вилик финин карда хьанвай агалкьунрикай, арадал гъанвай цIийи мумкинвилерикай ихтилатна.

Турнирда 2005-2008-йисара дидедиз хьайи, 26 килограммдилай 58 килограммдал кьван заланвал авайбуру (кьилдин заланвилин дережайра) чпин къуватарни алакьунар къалурна. Спортсменар республикадин 13 райондайни шегьердай атанвай.

Гъалибчияр ва вири иштиракчияр грамотайралди, кубокралди ва пулдин пишкешралди къейдна. Кьилдин спортсменар «Турнирдин лап хъсан пагьливан», «Лап хъсан техника», «Гъалибвилин къаст хьунай» номинацийра грамотайралди ва пишкешралди къейдна.

«Лезги газет»