24-сентябрдиз Дагъустандин Кьил Владимир Васильева кьуршахар кьунин спортдин акъажунрай ва боксдай кьиле фейи дуьньядин чемпионатрин гъалибчиярни призёрар, гьакI абурун тренерар шад гьалара кьабулна.
РикIел хкин: азаддаказ ва дишегьлийри кьуршахар кьунай дуьньядин чемпионат алай йисуз Къазахстанда — Нур-Султан шегьерда кьиле фена. Ана дуьньядин 79 уьлкведай тир 520 спортсменди чпин устадвал къалурна. Россиядин хкянавай командадик Дагъустандай тир 7 спортсмен квай. Абуру вирида медалар къазанмишна. Къизилдин медалриз лайихлу хьайибурун жергеда ава: Абдулрашид Садулаев, Гьажимурад Рашидов, Заур Угуев, Инна Тражукова. Гимишдин медаль Мегьамедрасул Идрисова къазанмишна. Алихан Жабраилов ва Гьажи Набиев буьруьнждин медалриз лайихлу хьана.
Боксдай дуьньядин чемпионат Екатеринбургда кьиле фена. Виридалайни викIегьбур тайинарун патал иниз дуьньядин 78 уьлкведай тир 365 спортсмен атанвай. Россиядин хкянавай командадик кваз дагъустанви боксёр Муслим Гьажимегьамедовани иштиракна. 91 кг-дал къведалди заланвал авайбурун арада бягьсина чи ватандашди къизилдин медаль къазанмишна.
Дагъустандин спортсменриз дуьньядин чемпионатра къазанмишнавай гъалибвилер тебрик авунихъ галаз сад хьиз, В.Васильева абуруз чпин вилик эцигнавай чIехи везифаяр кьилиз акъудун — спортдин кьакьан кукIушар муьтIуьгъарун патал къуватар гьайиф татана зегьмет чIугун хас тирди къейдна. Идалайни гъейри, Дагъустандин Кьили дагъустанвийрин агалкьунри республикадин авторитет хкажзавайди, абуру общественно-политический уьмуьрда иштиракуни регион вилик финик гьерекат кутадайди алава хъувуна.
Республикадин физический культура ва спорт вилик тухунай, гьакI еке агалкьунар къазанмишунай В.Васильева кIватI хьанвай спортсменрив ва абурун тренеррив госнаградаяр вахкана.
«Лезги газет»
