ГьикI галукьна и ван къе зи япарихъ?

ГьикI чIалахъ жен, амач лугьуз Амри дах?

КIанзавач заз агъазни и гафарихъ,

Вун галачиз я зун ялгъуз, Амри дах!

 

Еке алим, редактор зи ктабдин,

Генерал тир пак алимрин штабдин.

Ви гуьгъуьна дуьайрин гаф сувабдин

Жеда, гьелбет, йифиз, юкъуз, Амри дах!

 

Етим хьана чи тарихдин тавхана,

На лугьуди, чи кьилерал цав хана.

Малаикар аквада вав рахана,

Чпин зикир ийиз куз-куз, Амри дах!

 

Ви зегьметар, чIугур кьван, ни гьисабна,

Тесниф авур шумуд цIудралд ктаб на.

Чи рикIериз вучиз гана азаб на?

Къакъатна вун чавай вахтсуз, Амри дах!

 

Сажидинни, вирибур хьиз, шезва къе,

Эхиратдиз фин хажалат жезва къе.

Агъзурралди вун рекье тваз къвезва къе,

Шад мярекат авай йисуз, Амри дах!

Сажидин Саидгьасанов