Чи ватанэгьлияр — гьар сана
И сеферда зи ихтилат жегьил художник-модельер Сабина Макатовадикай я. Ам 1993-йисуз Москвада дидедиз хьана. Дагъларини рехи Каспийди датIана илгьам гузвай москвави! Адан буба Агъариза Ахцегьай я, диде Фаина — Шихидхуьряй.
Ирид йисан яшда авай чIавалай ам художественный жуьреба-жуьре мектебризни студийриз физ хьана. Москвада авай “Грани” художественный мектеб тафаватлудаказ ва МГУ-дин дизайндинни технологиядин факультет куьтягьна. 2016-йисуз ада Модадин кIвал ва “SABINA MAK” бренддик бине кутуна ва ачухна.
Сабина Макатовадихъ международный хейлин конкурсра къазанмишнавай агалкьунар тIимил авач. 2009-йисуз ада StarMoney изобразительный искусстводин международный конкурсдин Гран-при къачуна, 2011-йисуз адакай “Гележегдиз кам-2011” конкурсдин финалист, 2013-йисуз международный “HoIzgarten” проектдин гъалибчи, “Формула стиля” конкурсдин дипломантдин тIварцIин сагьиб хьана, Москвада кьиле фейи вирироссиядин дизайнеррин конкурсда 2-чка кьуна.
С.Макатовади гуьгъуьнин йисарани машгьур конкурсра гзаф кьадар гъалибвилер къачуна. Ам кьетIен жуьредин, садазни тешпигь тушир, искусстводин алемда вичиз вини дережадин къимет гузвай художник я. Адан бажарагъдиз пешекар амадагри лайихлу къимет ганва. 2017-йисалай ам, машгьур дизайнерар тир Вячеслав Зайцевахъ, Игорь Гуляевахъ, Валентин Юдашкинахъ галаз са жергеда аваз, жегьил дизайнеррин “Точка.ру” конкурсдин гьамишан жюридин векилрикай сад я.
2019-йисуз ада, сифте сеферда, режиссер-постановщик яз, са шумуд сятда уьлкведин меркезда кьиле фейи Рождестводин концертдин “JazzPort” проектда иштиракна.
Сабинади Москвада вичин “SABINA MAK” Модадин кIвал ачухна ва тешпигь авачир хьтин хсуси затIар арадал гъизва. Адан коллекцийра куьлуь-шуьлуьйризни, эскиздилай башламишна, гьар са цвал алай чкадизни фагьум-фикир ганва. Парталар цунин гьерекатар герек тир гуьзчивилик кутунин, нетижада са синихни квачир затI арадал гъунин алакьунар ава жегьил устаддихъ.
Бренддик бине кутур пешекарди тестикьарзавайвал, коллекцияр арадал гъунин карда ада вичиз кьуд патай аквазвай затIарилай илгьам къачузва: шегьердин куьчейрилай, инсанрилай ва гуьрчег дараматрилай. Парталар ва аксессуарар туькIуьрунилай гъейри, Модадин кIвали интерьердин затIарни гьасилзава: картинаяр ва чинидин шейэр.
Исятда Сабинади бине кутунвай Модадин кIвал, “JazzPort” концертдин проектдин сергьятра аваз, Москвадин концертрин залда кьиле фидай мярекатда къалурдай цIийи коллекция гьазурунал машгъул я.
Гележегда адахъ хайиди тир Дагъустан Республикадин меркезда вичи арадал гъизвай надир затIарин гъвечIи туьквен ахъайдай фикир ава.
Къуй бажарагълу устаддин къастар кьилиз акъатрай!
К.Ферзалиев
