Алатай гьафтеда Мегьарамдхуьре “Ярагъ Мегьамед эфенди — Дагъустандин чIехи дамах” лишандик кваз алим, арифдар, шейх Ярагъ Мегьамедан экуь къаматдиз бахшнавай форум кьиле фена. Къейд ийин хьи, и мярекат тешкилиз кьвед лагьай йис я. Ам хъсан деражада аваз кьиле тухуник РД-дин милли сиясатдин ва динрин крарин рекьяй министерстводи, Дагъустандин Муфтиятди ва Мегьарамдхуьруьн райондин администрацияди еке пай кутуна.

Форумда гьукумдин, жемиятдин, илим­дин векилри, динэгьлийри, патарилай хтанвай мугьманри иштиракуни адан важиблувиликай лугьузвай. Иштиракчийрин арада Мегьарамдхуьруьн райондин кьил Фарид Агьмедов, РД-дин милли сиясатдин ва динрин крарин рекьяй министрдин заместитель Мурад Шафиев, республикадин Муфтийдин куьмекчи Идрис Асадуллаев, философиядин илимрин доктор, профессор Салигь Муслимов, Ярагъ Мегьамедан тIварунихъ галай мергьяматлувилин фондунин регьбер Гьажибуба Рустамов, “Лезги газетдин” кьилин редактор Мегьамед Ибрагьимов, Кеферпатан Кавказдин исламдин рекьяй ахтармишунар тухудай центрадин директор Руслан Гереев, Гуниб райондин векилар ва масабур авай.

Мярекат, сифте гаф рахуналди ва мугьманар тебрикуналди, Фарид Агьмедова ачухна:

— Дагъустандин берекатлу чил, — лагьа­на райондин кьили, — асирралди дуствилелди яшамиш жезвай жуьреба-жуьре халкьарин, динрин векилрин ватан я. — Да­гъустан вири дуьньядиз машгьур авур алимар гзаф хьана. Абурун арада Дагъус­тандинни Чечнядин имамрин руьгьдин насигьатчи Ярагъ Мегьамеда лайихлу чка кьазва. Тарихдин деринрай камаллу шейх алай аямдин несилрин вилик уьмуьрдин чIехи муаллим, дагъвийрин сад лагьай демократ, гьахълу гафунинни имандин, азадвилинни эдебдин терефдар, Дагъларин уьлкведин халкьар садзавай ярж яз экъечIзава. Тарихдин вилик алимдин зурба лайихлувилериз къимет гуз хьун четин я. Гьакьван зурба я абур, — къейдна Фа­рид Агьмедова.

Шаз кьиле фейи форумдин сергьятра аваз Мегьарамдхуьруьн райондин кьили мярекатдиз гьар йисуз тешкилдай регионрин уртах (межрегиональный) форумдин дережа гун патал талукь идарайриз чарар-цIарар кхьин теклифнай. И жигьетдай чIугур зегьметди нетижаярни гана. Фарид Агьмедован гафарай малум хьайи­вал, Ярагъ Мегьамедан гьуьрметдай тешкилзавай форумдиз ихьтин дережа ганва. И кар кьилиз акъудун патал райондин администрациядиз куьмекар гайи гьар са кас­диз ада сагърай лагьана. “Форумдиз ихь­тин дережа гуни шейх Ярагъ Мегьамедан девлетлу ирс дериндай чирдай, адан важиблувал жемятдин, иллаки жегьилрин, арада мадни машгьурдай мумкинвал гу­да”, — алава хъувуна Ф.Агьмедова.

Гуьгъуьнлай мярекат Ярагъ Мегьамедан несилрикай тир гьафиз Саидмугьаммад Гьамидова Къуръандин аятар кIелу­налди давамарна.

Ярагъ Мегьамедан къаматда аваз сегь­недиз экъечIай Лезги театрдин актер, Россиядин лайихлу артист, Дагъустандин халкьдин артист Абдуллагь Гьабибова кIе-лай шейхдин насигьатри иштиракчийриз кьетIен таъсир авуна.

КIватI хьанвайбур РД-дин милли сиясатдин ва динрин крарин рекьяй министр Энрик Муслимован тIварунихъай адан ­за­меститель Мурад Шафиева тебрикна. Адан фикирдалди, республикада яшамиш жез­вай халкьарин руьгьдинни медениятдин квахьзавай ивиррал чан хкунин карда­ и форумди еке чка кьазва ва мярекатди халкьарин садвал, дуствал генани мягькемарзава.

— Ярагъ Мегьамед дуьньядин тарихда акьалтIай чирвилер авай, вичин фикиррин гьахълувилихъ кIевелай инанмиш тир инсан, дерин акьулдин сагьиб яз гьатнава. Кавказдин халкьар патал адан тIвар намусдин яржуниз элкъвена. Ниятар михьи, руьгьдиз кьакьан, ахлакьдин жигьетдай зурба къуват авай кас тирвиляй адалай, жуьреба-жуьре халкьар садна, азадвилин женгиниз къарагъариз алакьна, — лагьана М.Шафиева.

Гуьгъуьнлай рахай Идрис Асадуллаева Дагъустандин Муфтийдин патай форумдин иштиракчийрал саламар агакьарна. Ада Ярагъ Мегьамедан уьмуьрда кьиле фейи вакъиайрикай суьгьбетна ва а вахтара Къуръандин гъавурда гьатунин рекьяй шейхдиз барабар кас тахьайди къейдна.

Философиядин илимрин доктор Салигь Муслимова Ярагъ Мегьамедан бажарагъдин кьетIенвилерикай, ам вичин девирда азадвилин тIаратI гваз майдандиз экъечIай зурба алим хьайидакай лагьана.

Гьажибуба Рустамова Вини Ярагърин хуьрел чан хкунин махсус программа кьабулунин теклиф гунихъ галаз санал Советрин девирда шейхдин гьуьрметлу тIвар арадал хкунин карда гьалтай четинвилерикайни манийвилерикай ихтилатна.

“Лезги газетдин” кьилин редактор Мегьамед Ибрагьимова вичин рахунра чIехи шейхдин ирс хуьнин, чирунин ва ам несилрал агакьарунин кIвалах форум тухуналди акьал­тIарна виже текъведайди къейдна. Ада жегьилриз тарих, вилик девирра яшамиш хьайи чи машгьур векилар, абурун уьмуьрдин ва яратмишунрин рехъ дериндай чирун патал мектебра гьар жуьредин мярекатар (конкурсар, олимпиадаяр, гуьруьшар) тешкилун теклифна. М.Ибра-гьи­мова гьакIни мярекатдин иштиракчийрин арада авай Кьиблепатан Дагъустандин хуьрерин имамриз “Лезги газетдин” редакциядихъ галаз алакъаяр хуьниз, эдебдин, ахлакьдин, тербиядин месэлайрай макъалаяр кхьиниз эвер гана.

Форумдин сергьятра аваз Гуниб райондин векил Мегьамед Абдуллаев, Кеферпатан Кавказдин исламдин рекьяй ахтармишунар тухудай центрадин директор Руслан Гереев, Дагъустандин гуманитарный институтдин муаллим Рашид Алимурадов, Мегьарамдхуьруьн райондин имамрин советдин председатель Агьмад Мегьамедов ва масабурни рахана.

ДГУ-дин тарихдин факультетдин илимдин къуллугъчи, жегьил та­­рихчи Агьмедия Магьадован доклад форумдин иштиракчийри иллаки хушдиз кьабулна. Кьилди къа­чур­­тIа, ам шейх Ярагъ Мегьамедан ир­синиз къецепатан уьлквейрин алимри ганвай къиметдикай рахана.

Мярекатдин нетижаяр кьуналди, РД-дин милли сиясатдин ва динрин крарин рекьяй министерстводин управленидин начальник Хасайбат Валиевади къарар кIелна.

Форумдин сергьятра аваз са жерге ксарив гьуьрметдин знакар, грамотаяр вахкана. Кьилди къачур­тIа, жегьилриз ватанпересвилин тербия гунин ва жемият вилик тухунин кардик еке пай кутунай Мегьарамдхуьруьн райондин кьил Фарид Агьмедов “Буржи ва намус” ордендиз лайихлу хьана. Къейд ийин хьи, райондин кьилиз ихьтин орден гунин теклиф РД-дин жемиятдин комиссиядиз Кеферпатан Кавказдин исламдин рекьяй ахтармишунар тухудай центради ганвай. Анин директорди Фарид Агьмедовав Дагъустандин халкьарин арада дуствал хуьнин карда активнидаказ иштиракунай Гьуьрметдин грамотани вахкана.

Мурад Шафиева Мегьарамдхуьруьн райондин кьилин сад лагьай заместитель Гьабибуллагь Мурадалиеван ва профессор Салигь Муслимован зегьметар РД-дин милли сиясатдин ва динрин крарин рекьяй министерстводин гьуьрметдин знакар гуналди къейдна. Гуниб ва Мегьарамдхуьруьн районрин векилри сада-садаз шейхдин суьретар багъишна. Форум кьиле тухуник кьетIен пай кутур са жерге юлдашар РД-дин милли сиясатдин ва динрин крарин рекьяй министерстводин ва Мегьарамдхуьруьн райондин администрациядин патай гьуьрметдин грамотайриз лайихлу хьана.

Форумдин кьвед лагьай пай Мегьарамдхуьруьн райондин хуьрерин культурадин уртах центрадин гьаятда давам хьана. Ина мугьманриз суфраяр ачухнавай. Заур Сали­гьова, “Хаят” тIвар алай дестедик квай аялри форумдин иштиракчийриз нашидрин концерт гана.

Агьмед Магьмудов