14-сентябрдиз, 47 йисан яшда аваз, яргъал чIугур азардилай гуьгъуьниз къени инсан, хъсан дуст, бажарагълу регьбер яз хьайи Азнаур Чингисханович Аджиеван рикI акъвазна.
Азнаур Аджиев 1973-йисан 7-июндиз Хасавюрт шегьерда дидедиз хьана. Ада Дагъустандин государстводин педагогвилин университетдин къецепатан чIаларин факультет ва Имам Шамилан тIварунихъ галай Кавказдин халкьарин университет (Кавказдин халкьарин светский институт) акьалтIарна. Ам филолог, журналист тир. Адан зегьметдин рехъ 1995-йисуз башламиш хьана. Жуьреба-жуьре йисара ада ДГПУ-дин араб чIалан кафедрадин преподавателвиле, РД-дин ГБУ-дин — “Дагъустан” РГВК-дин генеральный директорвиле кIвалахна. 2013-йисалай 2016-йисалди ам Дагъустан Республикадин печатдин ва информациядин министр тир. Уьмуьрдин эхиримжи йисара ада “Россия — зи тарих. Махачкъала шегьер” музейдин директорвиле кIвалахна.
Азнаур Чингисхановича вичин къанажагълу вири уьмуьр Дагъустандиз ва Дагъустандин журналистикадиз бахшна. Ам искусстводин рекьяй Дагъустан Республикадин Государстводин премиядин лауреат, Россиядин телерадиовещателрин Милли ассоциациядин правленидин член тир.
Агъзурралди дагъустанвийриз ам масадан дердидикай хабар кьадай, къени, дамах гвачир ва къайгъудар кас хьиз чидай. Ада игьтияж авай вирибуруз гьамиша куьмекдин гъил яргъи ийидай.
Азнаур Чингисханович къакъатун — им адан экуь къамат чпин рикIера хуьдай вирибур патал еке магьрумвал я.
“Лезги газетдин” редакциядин коллективди Азнаур Аджиеван багърийриз, вири мукьва-кьилийриз, багьа инсандикай магьрум хьунихъ галаз алакъалу яз, дериндай хажалат чIугунивди, башсагълугъвал гузва.
