Сулейман-Стальский райондин администрацияда райондин кьил Нариман Абдулмуталибован регьбервилик кваз 90 йисан юбилей къейд авунин рекьяй оргкомитетдин нубатдин заседание кьиле фена.

Юбилейдиз гьазурвилер акунин жигьетдай районда тухузвай кIвалахдикай культурадин отделдин начальник Майрудин Бабаханов рахана. Ада къейд авурвал, юбилейдин мярекатар 19-октябрдиз Кьасумхуьруьн майдандал ва И. Гь.Тагьирован тIвару­нихъ галай Культурадин дворецда кьиле тухуда. Суварин программадик райондикай ва баркаллу районэгьлийрикай акъуднавай ктабрин выставкаяр, халкьдин сеняткарвилин алатар, АПК-ди гьасилнавай суьрсетдин шейэр, милли га­мар, вилик вахтара яшайишда ишлемишиз хьайи шейэр, милли хуьрекар… жеда. Хуьрерин культурадинни ял ягъу­нин центрайри чпин майданар ачухда. Гьа юкъуз­ республикадин “Куьредин ярар” фестивални кьиле тухуда. Ана Кьиблепатан Дагъустандин 10 райондин ва 2 шегьердин векилри иштиракда.

Алай вахтунда райцентрадин кьилин куьче аваданламишзава — тротуарар туькIуьрзава, куьче гегьеншарзава. Культурадин дворецдиз физвай рекье  къир  цада, куьчеяр, рекьер, общественный дараматар пайдахралди, транспарантралди, баннерралди, лозунгралди безетмишда. ГьакIни юбилейдиз талукьарна шартIунин махсус къапар, значокар, пакетар, календарар, кепкаяр, суварин эмблемаяр алай футболкаяр, чкадин авторрин художественный ктабар гьазурда.

Нариман Абдулмуталибова къейд авурвал, юбилей — им райондин культурадин уьмуьрда кье­тIен вакъиа жеда. Ам виниз тир дережада аваз кьи­лени тухун патал ада талукь ксариз, къуллугъриз, жавабдар пе­шекарриз тапшуругъар гана, меслятар къалурна.

Хазран Кьасумов