Гьуьрметлу ватанэгьлияр!
Лезги чIал чирзавай ва адал рикI алай вирибур!
10-октябрдин йикъан сятдин 3-даз тарихда сифте яз лезги чIалал международный тотальный (вирибуру сад хьиз кхьизвай) диктант кхьин тешкилда. Ихьтин серенжем кьиле тухунин къарарар Махачкъалада, Москвада, Дербентда, Ярославлда, Бакуда, Харьковда, Киевда ва масанрани кьабулнава. Ам, гьакъикъатдани, вири халкьарин сад тирди жеда, ада Россиядин, Азербайжандин, Белоруссиядин, Украинадин, Къазахстандин ва маса уьлквейрин майданар агудда.
Диктант кьиле тухун патал майданар тешкилунин арзаяр РФ-дин регионрай, СНГ-дин уьлквейрай, гьакIни яргъал тир къецепатайни атанва ва атун давам жезва. Дагъустанда тотальный диктант Махачкъалада, “Россия — зи тарих” тIвар алай тарихдин паркда ачухнавай майдандал кьиле фида.
Диктант кьиле тухунин къарар Дербент шегьерда 2019-йисан 20-апрелдиз кьиле фейи тешкиллувилин комитетдин заседанидал кьабулнай. И комитетдик ква: Нариман Абдулмуталибов — Сулейман-Стальский райондин кьил; Седакъет Керимова — общественный деятель, писатель, публицист, “Самур” газетдин кьилин редактор; Мегьамед Ибрагьимов — “Лезги газетдин” кьилин редактор; Васиф Гьасанов — ФЛНКА-дин вице-президент, Ярославлдин лезгийрин РНКА-дин руководитель; Амил Саркаров — “Дербент” РИА-дин кьилин редактордин заместитель, ФЛНКА-дин вице-президент; Фарман Шайдабегов — “Леки” фондунин исполнительный директор; Равидин Абдурагьимов — “Кьиблепатан Дагъустандин жегьилрин Союз” ДРОО-дин руководитель, Гуьлера Камилова — режиссер, тележурналист; Пакизат Рагьимханова ва Низами Фетулаев — Махачкъаладин ва Дербентдин лезгийрин МНКА-дин руководителар; лезгийрин общественностдин ва илимдин идарайрин хейлин маса векилар.
Лезгийрин сад лагьай тотальный диктант сифте яз Сулейман-Стальский районда 2019-йисан майдиз кьиле фена. Ам Дагъустандин халкьдин шаир СтIал Сулейманан 150 йисаз талукьарнавай.
Лезгийрин международный тотальный диктантда хайи чIалал рикI алай ва чпихъ а мумкинвал авай вирибурувай, тайин тир майданрал фена, иштирак ийиз жеда. Буюр, иштирака, азизбур!
«Лезги газет»
