10-сентябрдиз Кьурагь райондин центрадин спортдин дараматда столдин теннисдай итимрин арада чемпионат кьиле фена. И хабар «Лезги газетдив» муниципалитетдин администрациядин пресс-къуллугъди агакьарна.
Мярекат терроризмдиз акси женгина рейсадвилин ва Дагъустандин халкьарин садвилин йикъарин сергьятра аваз, райондин администрациядин физкультурадин, спортдин ва жегьилрин крарин отделди тешкилна. Къейдзавайвал, и йисуз акъажунар кьиле тухуниз Махачкъалада яшамиш жезвай кьурагьви карчи Расим Исмаилова куьмекна. Кьилди къачуртIа, ватанэгьлиди вичин хуьруьн спортзалдиз теннис къугъуна герек жедай тадаракар, чемпионатда агалкьунар хьайибуруз гудай пишкешар багъишна.
Къейдна кIанда хьи, столдин теннисдай районда гьар йисуз акъажунар кьиле тухузва, адан макьсадни спортдин и жуьре машгьурун ва республикадин дережадин акъажунра иштиракдай лап хъсан теннис къугъвадайбур хкягъун я.
ЦIи 9-сеферда яз тешкилай чемпионатда чпин алакьунар къалурун патал Мегьарамдхуьруьн, Ахцегь, Кьурагь, Дербент, Шамил районрай, Махачкъала ва Каспийск шегьеррай, санлайкъачурла, 25 теннисист атанвай. Акъажунар кьве группада кьиле фена. Сад лагьай группада Кьурагь райондин теннисистар къугъвана. Кьвед лагьай группада лап хъсан теннисистдин тIвар къазанмишун патал районринни шегьеррин спортсменри женг чIугуна.
Акъажунрин нетижада чкадин спортсменрикай агъадихъ къейднавайбур тафаватлу хьана:
- Къурбанов Замир – 1-чка.
- Гьашумов Рамиз – 2-чка.
- Мамедов Рустам – 3-чка.
Асас группада иштиракай спортсменрин арада тафаватлу хьайибур:
- Рустамов Эльдар (Каспийск) – 1-чка.
- Къулиев Мегьамедэмин (Мегьарамдхуьр) – 2-чка.
- Рамазанов Рамиз (Кьурагь) – 3-чка.
Къейд ийин, вири иштиракчийриз чемпионатдин тешкилатчийрин патай рикIел аламукьдай футболкаяр, гъалибчийриз, хъсан чкаяр кьурбуруз грамотаяр, медалар, къиметлу савкьатар ва пулдин пишкешар гана.
«Лезги газет»
