Дагъустан Республикадин лайихлу эцигунардайди ва Дербент райондин гьуьрметлу гражданин Гьажи Ражабович Жабраилова регьбервал гузвай Дербентдин кIвалер эцигдай ОАО “Дагюгстрой” комбинат неинки са Дербентда, гьакI вири Кеферпатан Кавказдани чIехи карханайрикай сад я.
Вич арадал атай сифте йикъарилай гатIунна кIвенкIвечи карханадин коллективди Дербентда, Дагъустандин Огнида, Избербашда ва Каспийскда яшайишдин гзаф кIвалер, хейлин мектебар, аялрин бахчаяр, культурадинни майишатдин маса объектар эцигна, ишлемишиз вахкана ва и кIвалах давамарзава.
Дагъустандин кьиблепатан районрай Дербентдиз къвезвай гьар са касдин вил, “Южный” автостанциядив агакьдалди, сифтени-сифте федеральный шегьредин агъа пата авай, гьар сад кIуьд мертебадикай ибарат, винел патан акунар сад-садаз ухшар са жерге дараматра акьада. Анаг йикъалай — къуз чIехи ва гуьрчег жезвай къадим шегьердин “Южный” тIвар алай микрорайон я.
И микрорайонда хкаж хьанвай яшайишдин вири кIвалерни Гьажи Жабраилов кьиле авай бажарагълу коллективди эцигнавайбур я. КIвалахар я гатуз, я хъуьтIуьн азгар йикъарани акъваззавач, цавук кутунвай ракьун гурарар хьтин зурба кьакьан кранри карханадин цехрай гьар юкъуз махсус автомашинра аваз иниз гъизвай ракьунни бетондин панелар винел хкажзава, тежрибалу электросварщикри абур мукьуфдивди ва чпиз хас тир устадвилелди сад-садахъ мягькемдиз галкIурзава, цлар арадал къвезва. Ингье нетижаярни.
Алай йисан 7 вацра кIвенкIвечи коллективди 70 агъзур квадратный метрдилай артух кIвалер эцигна, ишлемишиз вахканва. Гаталай кьулухъ гьаваяр са кьадар серин жердавай эцигунрин кIвалахрин еришарни йигин жезва.
Гьа икI, “Южный” микрорайон, акваз-акваз, гегьенш ва гуьрчег жезва. Лап мукьвал йисара ана вири къулайвилер авай кIвалера 40 агъзур касдив агакьна агьалияр яшамиш жеда. Килиг садра, тамам са шегьер!
Къейдна кIанда хьи, ОАО “Дагюгстрой” карханада бажарагълу, кар алакьдай, битав коллектив арадал атанва. Инсанрин патахъай чIехи къайгъударвалзавай регьбер Гьажи Ражабовичалай коллективдин асул диб хуьз алакьнава. Вирибур кIвалералди таъмин я, гекъигайла, мажибарни писбур туш — лап тежрибалу пешекарри гьар вацра 25-30 агъзурдав агакьна зегьметдин гьакъи къачузва.
Эцигунардай машгьур карханада зегьметда гуьгъуьна амукьзавай кас ерли авач. Гьавиляй хъсанбурукай лап хъсанбурун тIварар кьада. ГьикI хьи, мухбир тир зазни абур фадлай таниш ксар я: ракьунни бетондин шейэрин (панелар гьазурдай) формовщикар, зегьметдин ветеранар Валентин Юсуфов, Омар Мегьамедов ва Зейнал Межидов, арматурщик Ханагьмед Ханагьмедов, электрик Фирудин Багъиров, бетондин къаришма гьазурдай цехдин оператор Мирзехан Мирзеханов, слесарь Ханлар Къурбанов, сварщик-монтажник Альфред Абдурагьимов ва икI мад.
“Чи коллективди, гьамиша хьиз, алай йисузни вичин вилик эцигнавай везифаяр агалкьунралди тамамарда”, — лугьузва Гь.Жабраилова.
Зун и кардихъ инанмиш я. ГьикI хьи, ам кьиле авай коллективдин гафар садрани краривай къакъатайди туш.
Нариман Къарибов
