Чи республикадин, гьа жергедай яз Кьиблепатан Дагъустандин уьзуьмлухра ципицIрин заминламишнавай бегьер битмиш хьанва.
Технический сортарин ципицIрин залан куларни ширедив ацIузва.Гьелбетда, и карди, уьзуьмчияр хьиз, агакьзавай бегьер гьялдай карханайрин коллективарни шадарзава. Дербентдин газ квай чехирар акъуддай (ДЗИВ) заводдин ва коньякрин комбинатрин коллективарни гьакI я — виринра ципицIар кьабулиз ва пучвилер авачиз гьялиз гьерекатдик ква.
ЦIийи сезондиз чешнелудаказ гьазур хьунихъ галаз сад хьиз карханайра продукция акъудунни давам жезва. ИкI, ДЗИВ-ди цIинин йисан муьжуьд вацра саки 400 агъзур декалитр шампанское ва 50 агъзур дал маса чехирар хкуднава. Алатай йисан и вахтунив гекъигайла, цIи карханада 44,2 процентдин артух чехирар гьасилнава.
Дербентдин коньяк гьасилдай комбинатдин продукция, Россияда хьиз, дуьньядин маса уьлквейрани виниз тир еридалди машгьур я. Жуьреба-жуьре выставкайра и карханадин коньякри ва марочный чехирри къазанмишнавай медалрин, гран-прийрин ва дипломрин сан-гьисаб авач.
И мукьвара комбинатдин коллективди продукциядин виниз тир еридин рекьяй нубатдин гъалибвал къазанмишна. Карханадин генеральный директор П.Мишиева чаз малумарайвал, са тIимил вахт идалай вилик “Ялта. Золотой грифон-2017” лишандик кваз кьиле фейи международный конкурсда гъалиб хьуналди, Дербентдин коньякрин комбинатдин “Москва” коньякдин еридин винизвал Гран-при кубокдалди къейднава. Гьа и карханада гьасилзавай “Мерго-Шалбуздаг”, “Херес дагестанский” чехирри ва “Золотая рыбка” эрекьди конкурсда къизилдин медалар къазанмишна.
«Лезги Газет»
