Яргъа авай дагъларикай малум жезвай ракъинин нурари къвазвай марфадин куьлуь стIалрив рапрапар гуз тазва. Авадан хуьруьз Махачкъаладайни Дербентдай, Усугъчайдилай, лезги маса хуьрерайни мугьманар, вилик-кьилик квай ксар ахмиш жезва. Паталай атанвай машинар чкадин агьалийри ашукь Османан кIвал галайвал ракъурзава. 3-октябрдиз ина, РД-дин культурадин лайихлу работник ашукь Османан кIвале, чIехи мярекатар къурмишнавай, ашукьдиз 70 йисан юбилей мубаракзавай.
Мугьманар ашукь Османани адан хизанри, Авадан хуьруьн администрациядин кьил Бахтияр Мегьамедрагьимова, хуьруьн агъсакъалрин Советдин председатель Дадаш Дадашева къаршиламишзава. Ашукьар тир Алихана, Шимшира, Айдуна, МутIалиба, хурал чуьнгуьрар алаз, мугьманарни юбиляр шадарзава, руьгь, гьевес кутазва. Атанвайбуру суфрайрихъ худда тостар лугьузва.
Докъузпара райондин администрациядин кьилин заместитель Сурея Исмаиловади ашукьрин хизандихъ кьиле Осман Мегьамедрагьимов аваз мадни еке агалкьунар, идалай кьулухъ мадни чIехи юбилеяр къейддай мумкинвилер хьун алхишна.
Республикадин халкьдин яратмишунрин кIвалин (РДНТ) векил Минажат Мурадовади РД-дин культурадин министр Зарема Бутаевадин ва РДНТ-дин директор Марита Мугадовадин тебрикдин чарар кIелна, ашукьдив пишкешар вахкана. М. Мурадовади ашукь Османа Кьиблепатан Дагъустандин, вири республикадин медениятдик кутунвай пай къейдна.
Гьар са тостунилай гуьгъуьниз ашукьри лезгийрин милли ва чпин хсуси авазар тамамарзавай. Юбилярдиз манийралди тебрикдин гафар лугьузвай. Шиирралди, манийралди тебрикар Осман Мегьамедрагьимован веледри, къуни-къуншийрини ийизвай.
Докъузпара райондин администрациядин кьилин заместитель Салигь Гьажимурадова райондин кьил Абдурагьим Алискерован тебрикдин чар кIелна, пишкешар ва райондин гьуьрметдин знак вахкана.
Тебрикар-тостар райондин культурадин управленидин начальник Беглерхан Бабаева, хуьруьн кавха Бахтияр Мегьамедрагьимова, “Лезги газетдин” политикадин отделдин редактор Нариман Ибрагьимова ва масабуруни лагьана. Абуру Османахъ галаз таниш хьайи вахтар рикIел хкана, ашукьдин устадвиликай суьгьбетарна ва виридалайни чIехи бахт-мурад къе хтулри чIехи бубадин рехъ давамарун тирди къейдна.
Мярекатдин эхирдай ашукь Османа хурал чуьнгуьр кьуна… Нянин, тIебиат секин вахт, хуьре ашукь Османанан ва адан чуьнгуьрдин ван гьатна. Лезги халкьдин манияр, вичин ва маса ашукьрин эсерар ада лап таъсирдайвал тамамарна.
Осман Мегьамедрагьимов 1947-йисуз Ахцегь райондин Мичегьрин хуьре дидедиз хьана. Мичегьвияр хъуьтIуьхъай суьруьяр гваз Азербайжан пата авай къишлахрал физ, гатфариз хайи дагълариз хквез, яшамиш жезвай куьчери халкь тир. Османни гъвечIи чIавалай зегьметдал рикI алаз чIехи хьана. Сифтегьан классар хуьруьн школада кIелай ада чирвилер къачун Ахцегьа давамарна. Жегьил гадади колхоздани кIвалахзавай. Мичегьрин дагъларай армиядиз фейи Осман Каспий гьуьлуьн, ракьун рекьин ва къадим Дербент шегьердин патав гвай Авадандал хтана. Гьа и йисара мусибатдин залзаладилай кьулухъ Ахцегь райондин гзаф хуьрер арандиз куьч хьанвай. Ина ада яшамиш жедай кIвал, хуьруьн клубдин ва мискIиндин дараматар эцигна.
Османа вичин чIехи буба зуьрнечи Мемметрагьима хьиз кфил ягъиз чирна ва чIехи стхадихъ галаз межлисра зил кьаз гатIунна. Вичин алакьунар ада Лезги театрдин актёр язни ахтармишна. Лугьудайвал, ашукь яз Османаз вичиз-вич жагъана. Ам Вирисоюздин халкьдин яратмишунрин са шумуд фестивалдин лауреат — Юкьван Азияда, Закавказьеда, Ташкентда, Кировабадда кьиле фейи ашукьрин фестивалрин гъалибчи я. Ашукьрин манийрин межрегиональный фестивалда, республикадин “Мани лагь, ашукь” фестивалда, “Россиядин хизан” фестиваль-конкурсда сифтегьан чкаяр кьур ам адетар ва несилрин алакъаяр хуьнай “Россиядин хизан” премиядин “Династия» номинациядин, гьакIни Азербайжандин ашукьрин фестивалдин премиядин лауреатни я. Гзаф мярекатра ада вичин хсуси эсерар тамамарзава, месела, “Авадан хуьр”, “Хъсан къаридиз”, “Дустар сагърай” ва мсб.
Арандиз куьч хьайи хуьре вичин гъилералди эцигай клуб 1996-йисуз ада республикада авайни-авачир “Ашукьрин кIвализ” элкъуьрна ва къенин йикъалди анин директор яз кIвалахзава. Ина са шумуд ашукьди ва маса пешекарри зегьмет чIугвазва. “Ашукьрин кIвале” гьазурнавай халкьдин симер алай алатрин пешекарар вири республикадиз ва адалай къецепатани машгьур хьанва. Абур жуьреба-жуьре шабагьрин сагьибар я. Жегьил несилдиз лезги халкьдин симер алай алатар ягъиз чирунилай гъейри, ашукьди ина музалатар туькIуьрдай устIарханани кардик кутунва.
Осман Мегьамедрагьимов чIехи хизандин кьил — цIуд веледдин буба я. Адан вири аяларни музыкантар я. Вирида устадвилелди чуьнгуьр, саз, далдам ва музыкадин маса алатар язава. Хизандин ансамблдизни Ашукь Османа вичи регьбервал гузва. Мегьамедрагьимоврин хизандин ансамблди международный ва регионрин арада кьиле физвай фестивалра Дагъустандин патай векилвалзава.
Чуьнгуьрни гваз ам къецепатан уьлквейриз, Россиядин гзаф шегьерриз фена, гьар сана вичиз еке гьуьрмет къазанмишна, цIийи дустар-танишар хьана. Юбилейдин юкъузни магьир устаддиз, ашукьдиз гзаф чкайрай тебрикдин зенгер, телер къвезвай.
Эмираслан Шерифалиев
