3-октябрдиз Россиядин Федерациядин Президент Владимир Васильевахъ галаз гуьруьшмиш хьана. Гуьруьш кьиле фидай чIавуз Президентди ам Дагъустан Республикадин Кьилин везифаяр вахтуналди тамамарзавайди яз тайинарун къарардиз къачунвайдан гьакъиндай хабардарна.
Владимир Васильев тебрик авуналди, государстводин кьили лагьана: “Квез чизвайвал, ихтилат Дагъустандикай кватайла, чна гьамиша ам санлай уьлкведин лап важиблу регионрин жергеда авайди фикирда кьазва, Кавказдикай зун гьеле рахазвач. Дагъустан лап гуьрчег республика я, адан гуьзелвал неинки тIебиатдихъ галаз, сифтени-сифте ана яшамиш жезвай инсанрихъ галаз алакъалу я. Ана хейлин крар кьилиз акъудзава, са кьадар крар хъсанвилихъ дегиш жезва, амма, гьайиф хьи, гьялна кIанзамай месэлайрин сан лап екеди я.
Заз республикадин кьиле федеральный кIвалахдин тежриба авай кас акъвазнайтIа, лап рикIин сидкьидай кIанзавай. Заз Квевай къведай йисан сентябрдалди республикадин руководителдин везифаяр кьилиз акъудун тIалабиз кIанзава. Анлай анихъ хейлин крар Квелай ва саки са йисан и девирда кьиле фидай крарилай аслу жеда. Вучиз лагьайтIа, эхиримжи гьисабда месэла Дагъустандин халкьдин векилри — республикадин парламентдин депутатри гьялун лазим я. Дагъустан вич лагьайтIа, гзаф миллетрин векилрикай ибарат республика я”.
Суьгьбет кьиле фидай чIавуз В.Путина, къенепатан крарин министерствода ва Государстводин Думада кIвалахуналди, В.Васильева лап еке тежриба кIватIнавайди къейдна: “И йисара, са шакни алачиз, Куьн чпиз чина политикадин жигьетдай еке пар квай ксар лугьузвайбурун жергедик акатна. Куьн федеральный метлеб авай, федеральный дережадин политик я. Зи гьисабрай, республикадиз къе гьа ихьтин кас герекни ийизва”.
Вичин жавабдин гафуна Владимир Васильева им вич патал еке ихтибарвал авун тирди къейдна: “Теклифун вични, а теклиф Куь патай агакьунни еке гьуьрмет авун я. Зи вилик гьикьван асант тушир везифа акъваззаватIа, за аннамишзава. Амма заз теклиф авуналди Куьне гьайиф чIугван тийидайвал, за мумкин тир вири крар ийида. Виридалайни кар алайди лагьайтIа, уьмуьр авайдалай хъсанди ийиз жедайди ва авунни лазим тирди инсанри гьиссун патал чалишмиш жеда зун.
Зун и кIвалах рикIин сидкьидай, жавабдарвилелди, са шакни алачиз, инсанрикай, чкадин кадрийрикай даях кьуналди, ийиз алахъда. За ана са мус ятIани, асантбур тушир вахтара, кIвалахайди я. Эгер заз Куьне ва гуьгъуьнлай Дагъустандин халкьдини ихьтин ихтибар авунватIа, за, гьелбетда, жуван буржи, лап такабурлу, кIевелай ислягьвал кIани, бажарагълу, гзаф миллетрин векилрикай ибарат Дагъустандин халкьдикай даях кьуналди, намуслудаказ кьилиз акъудда. Дагъустандин халкь лагьайтIа, заз мукьувай чизвайди я”.
Гуьруьшдин эхирдай Россиядин Президентди Вадимир Васильеван тIварцIихъ агалкьунар хьана кIанивилин келимаяр лагьана.
Хизандикай:
Владимир Васильев 1949-йисан 11- августдиз Московский областдин Клин шегьерда дидедиз хьана. Вичин аял вахтарикай суьгьбетдайла, Владимир Васильева асул гьисабдай вич-вичин ихтиярда хьайидакай лугьузва. ГьикI хьи, адан диде Васильева Надежда Ивановнади хейлин вахт кIвалахал акъудзавай (ам аялрин бахчада тербиячи тир).
Буба — Асанбаев Али (Абдуали) Асанбаевични — миллетдал гьалтайла къазах-педагог тир. Адан диде-буба Къазахстанда, адан диде иниз практикадиз атанвай чIавуз, таниш хьайиди я, хизанда пуд аял тербияламишна — политикдихъ вичелай чIехи кьве стха ава. Ам тербияламишунин карда чIехи бубади ва, кьилди къачуртIа, ада кIватIнавай девлетлу библиотекади аквадай хьтин роль къугъвана. “Гьа и литература кIелун себеб яз зун гележегдин пеше хкягъунин фикирдални атана”, — хиве кьуна Владимир Васильева вичин са интервьюда.
Эвленмиш хьанва. Уьмуьрдин юлдаш Васильева (Одинцова) Людмила Дмитриевна экономист я. Абурухъ Юлия тIвар алай са руш, гьакIни хтул руш ава.
РД-дин Кьилин ва Гьукуматдин Администрациядин пресс-къуллугъ
Васильев Владимир Абдуалиевичан гьакъиндай
Ам Вирироссиядин “Сад тир Россия” тIвар алай политический партиядин Высший советдин Бюродин член, Вирироссиядин “Сад тир Россия” политический партиядин Генеральный советдин Президиумдин член, Россиядин Федерациядин Федеральный Собранидин Государстводин Думадин Председателдин заместитель, Россиядин Федерациядин Федеральный Собранидин Государстводин Думада “Сад тир Россия” фракциядин руководитель я.
1972-йисуз ада СССР-дин МВД-дин Москвадин милициядин махсус юкьван школа, 1978-йисуз заочнидаказ Вирисоюздин юридический институт, 1991-йисуз СССР-дин МВД-дин Академия куьтягьна. Ам юридический илимрин кандидат я.
1967-1968-йисара ам дуьм-дуьз приборар акъуддай НИИ-дин алцумунин кIвалахар тамамардай рабочий тир.
1968-1970-йисара ада Советрин Армиядин жергейра къуллугъна.
1972-1983-йисара адакай Москва шегьердин Бауманский РУВД-дин силисчи, инспектор, старший инспектор, БХСС-дин отделдин начальникдин заместитель, отделдин начальник хьана.
1983-1987-йисара Москва шегьердин ГУВД-дин УБХСС-дин отделдин начальникдин заместителдин везифаяр тамамарна.
1991-1992-йисара адакай РСФСР-дин МВД-дин идара авун тешкилдай Къуллугъдин инспекциядин кьилин инспектор хьана.
1992-1993-йисара Россиядин Федерациядин МВД-дин штабдин Кьилин инспекциядин кьилин инспектор тир.
1993-1995-йисара МВД-дин штабдин начальникдин заместителдин — Оперативный управленидин начальниквилин везифаяр тамамарна.
1995-1997-йисара ам Москвадин УВД-дин начальникдин сад лагьай заместитель — штабдин начальник тир.
1997-йисуз РФ-дин МВД-дин тешкиллу тахсиркарвилерихъ галаз женг чIугвадай Кьилин управленидин начальникдин сад лагьай заместителдин везифаяр тамамарна.
1997-1998-йисара РФ-дин къенепатан крарин министрдин сад лагьай заместитель — тешкиллу тахсиркарвилерихъ галаз женг чIугвадай Кьилин управленидин начальник тир.
1998-1999-йисара адакай РФ-дин къенепатан крарин министрдин сад лагьай заместитель хьана. 1999-2001-йисара ам РФ-дин Хатасузвилин Советдин секретардин заместитель тир.
2001-2003-йисара адакай РД-дин къенепатан крарин министрдин статс-секретарь-заместитель хьана.
Ам РФ-дин Федеральный Собранидин кьуд лагьай (2003-2007-йисар), вад лагьай (2007-йисан декабрдилай) созыврин Государстводин Думадин депутат тир. Хатасузвилин рекьяй Государстводин Думадин Комитетдин Председатель, “Сад тир Россия” фракциядин член я.
2010-йисан сентябрдалди “Сад тир Россия” партиядин Твердин региональный отделенидин Политический советдин секретардин везифаяр тамамарна.
2011-йисан 4-декабрдиз ам ругуд лагьай созывдин Госдумадин депутатвиле, хатасузвилин ва коррупциядиз аксивал авунин рекьяй Государстводин Думадин Комитетдин членвиле хкяна.
2016-йисан 18-сентябрдиз ам Россиядин Федерациядин Федеральный Собранидин VII созывдин Государстводин Думадин депутатвиле хкяна. Ам “Гражданвилин контроль” тIвар ганвай партийный проектдин руководитель я.
Владимир Васильевахъ милициядин генерал-полковникдин чин ава. Ам “Ватандин вилик лайихлувилерай” IV дережадин ордендин, ВикIегьвилин Ордендин, Гьуьрметдин Ордендин, гьакIни хейлин медалрин сагьиб я.
«Лезги газет»
