Махачкъалада, Сепараторный посёлокда авай 42-нумрадин юкьван школадани Чирвилерин югъ гзаф кьадар аялрин, диде-бубайрин ва мугьманрин, гьа гьисабдай яз меркездин администрациядин векилрин иштираквални аваз шад гьалара кьиле фена. Гаф школадин цIийи директор Тимур Саркароваз гана. Сувар мубарак авурдалай гуьгъуьниз ада муаллимри аялрал чIугвазвай зегьметдикай, школа вири патарихъай цIийи кIелунин йисаз гьазур тирдакай лагьана. Сифте яз школадиз къвезвайбурун, гьакIни вири аялрин, муаллимрин, диде-бубайрин тIварцIихъ тебрикдин хуш келимаяр шад мярекатдал рахай амай ксарини лагьана.
Алай йисуз 1-классдиз фейибурун арада Урдуханов Сулейманни ава. Адан буба Маратан ва диде Альфиядин гафарай малум хьайивал, Сулейманаз гьеле вичин 5 йис тамам хьайила мектебдиз физ кIанзавай. Ам хъсан кьатIунар авай аял я. Са куьруь вахтунда ада урус алфавитдин вири гьарфар кIелизни кхьиз чирна. КIелунрал, чирвилер къачунал рикI хьуни дидени буба шадарзава. Школада хъсан къиметар аваз кIелуник ва гележегда диде-бубадиз, Ватандиз вафалу велед хкатуник еке умудар кутунва.
Къуй Сулейманахъ ва чи амай вири балайрихъни кIелунин цIийи йисуз, гележегдани чIехи агалкьунар хьурай!
Регина Самедова
