31-августдиз Кьурагь райондин ветеринариядин къуллугъчийри чпин пешекарвилин сувар — ветеринариядин къуллугъчидин югъ шад гьалара къейдна.Суварин йикъаз талукьарнавай собрание ветеринариядин управленидин дараматда кьиле фена. Коллективдин вилик тебрикдин келимаяр райондин ветуправленидин начальник Надир Асланов рахана.
“Гьуьрметлу ветеринариядин къуллугъдин къуллугъчияр! За квез рикIин сидкьидай куь пешекарвилин сувар — ветеринариядин къуллугъчидин югъ мубаракзава. Куьне куь гьар йикъан зегьметдалди, гьайванрин сагъламвилин къайгъударвал чIугуналди, гьайванрикай къачузвай продукциядал гуьзчивал тухуналди, инсанрин сагъламвилин къаравулда акъвазуналди, агьалияр гьайванрикай инсанрик акатдай азаррикай хуьзва. Чи райондин агьалийри 16500 къарамал, 60400 лапаг ва маса жуьреба-жуьре гьайванар хуьзва. Абурун сагъламвилин къаравулда чпиз кьилин ва юкьван пешекарвилин чирвилер авай, чпин кIвалахдиз вафалу, алакьунралди тафаватлу жезвай 26 духтур акъвазнава. Куьне куь хиве авай везифаяр намуслувилелди кьилиз акъудзава. Гьавиляй къе чи райондин ветеринариядин управление республикадин дережада вилик жергейра ава.
Ветеринарвал мергьяматлу, гьайванрал рикI алай, абурун къадир авай, гьамиша абуруз куьмекдиз физ гьазур зурба инсанрин пеше я.
Заз квехъ сагъламвал, кIвале мублагьвал,хизандин къулан чимивал,кIвалахда инлай кьулухъни агалкьунар хьана кIанзава».
Управленидин начальникди зегьметда тафаватлу жезвай работникрин тIварар кьуна. Абурун жергеда Аладашдин ветлечебницадин заведующий Апаев Рамазан, КIутIулрин ветучастокдин духтур Къазиев Селимхан, Хвережрин ветпунктунин заведующий Ибрагьимов Хидирляс, Кьурагьрин ветлечебницадин заведующий Бабаев Давуд, ветуправленидин кьилин духтур Сефералиев Мавлудин ва мсб. авай.
Надир Асланова и мярекатдал гьар са работник, чпин гьакъисагъ зегьметдай, са вацран мажибдин кьадарда аваз премиядиз лайихлу хьанвайдан патахъай акъуднавай къарар кIелна.
Собранидал рахай работникри къачузвай виридалайни кIанин мажибриз, кIвалахда гьалтзавай бязи четинвилериз, улакь авачиз кьвед-пуд хуьруьз фин-хтунин рекьерин азиятриз килиг тавуна чпи намусдин къанунар вилик кутуна зегьмет чIугун гьа вердиш жуьреда давамарзавайди къейдна.
Мярекатдин кьвед лагьай пай тIямлу хуьрекар, яр-емиш, атирлу чаяр алай столрихъ, лезги манидинни макьамрин ван алаз кьиле фена.
Ветеринариядин къуллугъчийри чпиз неинки кIвалахиз, гьакI садвилелди, шадвилелди суварар, мярекатар хъсандиз кьиле тухуз чизвайди къалурна.
Сейфудин Шагьпазов