«Дагъустан» РИА-ди хабар гузвайвал, «Образованидин шегьер» форумдин сергьятра аваз, нетворкинг къайдада, ачух образованидин крар нетижалудаказ кьилиз акъудун патал сада муькуьдавай тежриба чирунин рекьяй международный выставка тешкилна.  

Чешмеди раижзавайвал, форум цIи пуд лагьай сеферда яз кьиле фена. Адан кIвалахда Россиядай ва маса уьлквейрай агъзурдалай гзаф спикерри иштиракна. Форумдин кIвалахдик и йисуз сифте яз Арабрин Сад хьанвай Эмиратар, виридуьньядин «Aqdar» саммит акахьна.

Къейд ийин, арабрин уьлкведин теклифдалди кьве важиблу дискуссияда модераторвиле дагъустанви, «Люминарий» проектдин руководитель Камил Мегьамедовани иштиракна.

Дискуссиядин вахтунда Камил Мегьамедова арабрин уьлкведин дестедиз Ахцегь райондин Хуьруьгрин хуьре кардик квай «Люминарий» центрадиз атун теклифна. Малум хьайивал, ОАЭ-дин образованидин министерстводин дестеди теклиф хушдиз кьабулна.

«Лезги газет»