Гьажиагъа Мегьамедшерифов. И тIвар чи багъри “Лезги газет” кIелзавайбуруз фадлай таниш я. Кеферпатан Кавказдин ракьун рекьин гьуьрметлу работник. Саки 60 йисуз и хиле гьакъисагъвилелди зегьмет чIугур и кьегьал лезги хциз неинки вич фадлай яшамиш жезвай Араблинка станциядал (Дербент район), гьакI къадим Дербентда, адалай къерехрани лайихлу гьуьрмет ава.
Вичин пешедал хьиз, Гьажиагъадин рикI журналистикадал ва поэзиядални гзаф ала. Адан эсерар “Дагъустандин правда”, “Даг. Панорама”, “Гудок”, “Сигнал”, “Звезда” газетризни мукьвал-мукьвал акъатзава.
Алай йис Гь.Мегьамедшерифов патал иллаки бегьерлуди хьанва. Дербент шегьердин “Типография — М” ООО издательствода галаз-галаз адан шииррин, гьикаяйрин ва новеллайрин кьве ктаб («Чархарин сесиник») лезги ва урус чIаларалди чапдай акъатнава.
Гь.Мегьамедшерифован ктаб зегьметчи инсанрикай, багъри ерийрикай, ватанпересвиликай я.
Нариман Къарибов
