Накь, 28-августдиз, Ахцегь райондин администрацияда райондин кьил Осман Абдулкеримова чпин хсуси дердийрин патахъай агьалияр кьабулунин нубатдин серенжем кьиле тухвана. И хабар «Лезги газетдив» райадминистрациядин пресс-къуллугъди агакьарна.

Агьалияр кьабулдай юкъуз райондин кьили 9 касди авур теклифриз, абуру къарагъарай месэлайриз килигна. Санлай къачурла, гзафбурун дердияр пешедин рекьяй кIвалахал тайинарунихъ галаз алакъалубур тир.

И юкъуз райондин кьилив чпин ата-бубайрин хуьр арадал хкунин макьсад вилик эцигнавай Ухулрин хуьряй тир са десте агьалиярни атанвай. Ухулвийри чпин хсуси такьатрихъ сифте нубатда хуьруьз фидай рехъ туькIуьрунин фикир малумарна. Ихьтин ватанпересвал къалурзавай ухулвийрин ниятар райондин кьилиз гзаф хуш хьана. Бубайрин ватандал чан хкунин карда эвелни-эвел къачуна кIани камар гьибур ятIа, гьабур веревирдна, гележегда и кIвалах вилик тухунин рекьер тайинарна. Малум хьайивал, сентябрдин сифте кьилерилай гатIунна кIвалахар кьилиз акъуддайвал я.

Гуьгъуьнлай Ахцегь хуьруьн гуьне патан агьалиди дигидай цин патахъай бязи вахтара четинвилер арадал къвезвайдакай хабардарна ва месэла гьялунин карда вичин фикирни теклифна.

О.Абдулкеримова гьар са месэладай талукь тир жавабдар ксариз тапшуругъар гана, кIвалахал акъвазунин гьакъиндай агьалийри авур арзаяр вичин хсуси гуьзчивилик кутуна.

«Лезги газет»