2019-йисуз Сулейман-Стальский райондай 210 выпускник машгьур университетрик, колледжрикни училищейрик экечIна.
«Лезги газетдиз» райадминистрациядин пресс-къуллугъди хабар гузвайвал, умуми образованидин мектебар куьтягьай 315 жегьилдикай 26 кас къизилдин медалдиз лайихлу хьана. Къейдзавайвал, эхиримжи йисара районда образованидин ери хъсанвилихъ дегиш жезва, и гьакъикъат ЕГЭ ва ОГЭ вахкунин карда арадал къвезвай хъсан нетижайри субутзава. Республикадин, уьлкведин тIвар-ван авай вузрик экечIзавайбурун кьадарни йис-сандавай артух жезва. Са шакни алач, вири и агалкьунарни нетижаяр, акьалтзавай несилриз чирвилерни тербия гунин карда муаллимри гьакъисагъвилелди, бегьерлувилелди кIвалахзавайдан гьакъиндай шагьидвалзавай делилар я.
Жаванри Дагъустандин ДГУ, ДГМУ, ДГТУ, ДГПУ, ДГУНХ ва маса вузар хкязава. Идалайни гъейри, уьлкведин маса регионрин, СНГ-дин университетрани чпи хкягъай пешейрай чирвилер къачузвай жегьилрин кьадар къвердавай пара жезва.
«Лезги газет»
