Дагъустандин духтуррилай са йисал къведалди яшара авай куьрпеяр кьинин дережа эхиримжи зур йисан вахтунда 21 процентдин агъузариз алакьнава.
Аялар кьинин дережа агъузарун — “Здравоохранение” милли проект кьилиз акъудунин хилерикай сад я. Алай йисан 1-паюна Дагъустандин здравоохраненидин министерстводилай, чи республикада милли и проект кьилиз акъудун яз, аялар кьинин дережа 2022-йисуз къалурнавайдав агакьариз алакьнава.
Дагъустандин здравоохраненидин министр Жамалудин Гьажиибрагьимова къейд авурвал, аялар кьинин дережа агъузарунин жигьетдай ихьтин рекъемрив агакьариз, сифте нубатда, регионда кьабулнавай са жерге серенжемрин — пешекар кадрияр гьазурун, репродуктивный медицинада, акушерство-гинекологияда, неонатологияда алай аямдин лап вилик фенвай технологияр уьмуьрдиз кечирмишунни кваз, гьакIни кIвачел залан тир дишегьлийриз ва аялриз, гьа гьисабдай яз, таза куьрпейризни куьмек гузвай медицинадин идараяр алай аямдин тадаракралди таъминарунин нетижада алакьна.
“Хаталувилин дестедик акатзавай кIвачел залан тир дишегьлийриз куьмек гун патал регионда перинатальный 3 центради кIвалахзава. Алатай йисуз Дагъустанда куьрпейриз 1700-дав агакьна виниз тир дережадин операцияр авуна. Алатнавай зур йисуз лагьайтIа, ахьтин 800 операция тамамарнава”, — хабар гана министрди.
Ада мадни алава хъувурвал, педиатриядин куьмек гунин кIвалахни хъсанарзава: медицинадин виниз тир дережадин технологийрал бинелу куьмекдин кьадар ва жуьре датIана артух жезва. Республикадин аялрин поликлиникайрив цIийи тадаракар агакьнава — медицинадин 32 идарадиз алай аямдин 94 тадарак маса къачунва.
«Лезги газет»
