Йисан эхирдалди Дагъустанда 315 етим ва диде-бубадин къаюмвал авачиз амукьай аялри хсуси кIвалерин куьлегар къачуда. И мурадар патал республикадин ва федеральный бюджетрай 259 миллион манат пул чара авунва. Идан гьакъиндай “Лезги газетдиз” РД-дин Минобрнаукадин пресс-къуллугъди хабар гана.
Маса къачузвай яшайишдин кIвалерин еридал гуьзчивал авун патал РД-дин Гьукуматдин Председателдин заместитель, РД-дин образованидин ва илимдин министр Уммупазил Омаровадин тапшуругъдалди республикадин муниципалитетра санитариядин ва техникадин рекьяй истемишунрихъ галаз кьазватIа чирун патал кIвалер ахтармишдай комиссияр туькIуьрнава.
Къенин юкъуз чи республикада етим ва диде-бубадин къаюмвал авачиз амукьнавай аялрин кьадар 4740 касдиз барабар я. 2019-йисуз кьабулай махсус серенжемрин нетижада абурун кьадар 220 касдин тIимилариз алакьна.
ГьакIни РД-дин Минобрнаукади етим ва диде-бубадин къаюмвал авачиз амукьнавай аялар тербияламишиз кьабулзавай хизанриз яшайишдин рекьяй куьмекар гунин серенжемар гегьеншардай кIвалах кьиле тухузва. Гьа икI, алай йисуз аялрин кIвалера тербияламиш жезвайбурун кьадар 77 касдив агакьна тIимилариз алакьна.
Эхиримжи кьве йисуз республикада етим ва диде-бубадин къаюмвал амачиз амукьай 635 аял яшайишдин кIвалералди таъминарна.
«Лезги газет»
