И йикъара Ахцегь райондин администрацияда райондин кьил Осман Абдулкеримован регьбервилик кваз райондин 90 йисан юбилей къейдунин гьазурвилер акунин гьакъиндай тешкиллувилин комитетдин заседание кьиле фена. Идакай «Лезги газетдиз» райадминистрациядин пресс-къуллугъди хабар гузва.

Тешкиллувилин комитетдик райадминистрациядин идарайрин, къурулушрин са жерге жавабдар къуллугъчияр акатнава. Юбилейдин мярекатар веревирдуниз талукь заседанидал райондин кьилин заместитель Алмас Шуаева тешкиллувилин комитетдик квай векилар гьар са месэладив жавабдарвилелди эгечIунин чарасузвал къейдна. Малум хьайивал, суварин кьилин мярекатар 5-октябрдиз кьиле тухудай фикир ава. Суварин концерт В.Эмирован тIварунихъ галай ял ядай багъда тешкилда. Юбилейдалди ана йифен экв твада, гьакIни маса алава кIвалахар кьилиз акъудда. Юбилейдин суварин сергьятра аваз, гьар са хуьруьн тарихдикай, машгьур ксарикай ва маса кьетIенвилерикай хабар гузвай кьилдин майданар арадал гъида. Абурулайни гъейри, майданрал милли хуьрекар, адетар, сеняткарвилер раижда. Медениятдин управленидин къуллугъчийри, художественный самодеятельностдин кIватIалри райондин вири хуьрера концертар кьиле тухуда.

Хуьрера михьивал, селигъалувал хуьнин месэладизни дикъет гуда. Хатасузвал ва къайдаяр хуьнин месэла полициядин къуллугъчийрин хиве тунва.

— Ахцегь райондиз «Лезгистандин гевгьер» гьавайда лугьузвайди туш, адан девлетлу тарихдиз, тIебиатдинни медениятдин кьетIенвилериз, тIвар-ван авай ксариз и тIвар гьахълувилелди лайихлу я, — юбилей кьиле тухунин важиблувал къейдуналди, лагьана Осман Абдулкеримова.

«Лезги газет»